މޯލްޑިވްސް މީޑިއާ ކައުންސިލުގެ 11 ވަނަ ނޫސްވެރިކަމުގެ އެވޯޑުގެ ނަޒާހަތްތެރިކަމާމެދުގައި ސުވާލު އުފައްދަވައި ކައުންސިލުގެ މެންބަރ ޢަލީ ނިޝާން މީސްމީޑިއާގައި ހާމަކުރައްވާފައިވަނީ އެއްވެސް އަސްލެއް ނެތް ދޮގު ތުހުމަތުތަކެއް ކަމުގައި އެ ކައުންސިލުގެ ރައީސް އަހްމަދު މުސްތަފާ ވިދާޅުވެއްޖެއެވެ.

މީޑިއާ ކައުންސިލުގެ ރައީސް ނޮވެމްބަރ 1 ވަނަ ދުވަހުގެ ރޭ ނެރުއްވި ބަޔާނެއްގައި ވަނީ މެންބަރ ޢަލީ ނިޝާން އެފަދަ ތުހުމަތު ކުރެއްވިއިރު، މީޑިއާ ކައުންސިލުން އޮކްޓޯބަރ 30 ވީ ބުދަދުވަހުގެ ރޭ ބޭއްވި އެވޯޑް ހަފުލާގެ އެއްވެސް ކަމެއްގައި ކައުންސިލުގެ ރައީސްގެ ހައިސިއްޔަތުން ސީދާ ބައިވެރިވުމެއް ނެތްކަން ކައުންސިލުގެ އެންމެހައި މެންބަރުންނާއި މުވައްޒަފުންނަށް އެނގިވަޑައިގަންނަވާނެ ކަމަށެވެ.

މި ކަމަކީ ނޫސްވެރިކަމުގެ އިނާމް ދޭން ފެށީއްސުރެ ޢަމަލު ކުރަމުން އަންނަ ގޮތް ކަމަށާއި ކައުންސިލުގެ ރައީސްއަށް، އިނާމް ލިބޭފަރާތްތަކާއި ނޮމިނޭޓްވާ ފަރާތްތަކުގެ މައުލޫމާތު އެންގިފައި ނުވާނެ ކަމަަށް ވެސް ބަޔާނުގައި ވެއެވެ. އަދި އެވޯޑުތަކުގެ ނޮމިނޭޝަންތަކާއި އެއާގުޅޭ އެންމެހައި ކަންކަން ކުރިއަށްގެންދިޔައީ ސީދާ މެންބަރ އަލީ ނިޝާން އާއި އިނާމު ކޮމިޓީގެ ނާއިބު މުޤައްރިރުގެ ބެލުމުގެ ދަށުންކަން ރައީސްގެ ބަޔާނުގައި ފާހަގަކުރައްވާފައި ވެއެވެ.

މީގެއިތުރުން އެވޯޑަށް ނޮމިނޭޓްވި ފަރާތްތަކުގެ ކޮންޓެންޓް އެޑިޓްކުރުމާއި އެއަށް ބޭނުންވާ ގްރެފިކްސް ހެދުން ކުރިއަށް ގެންގޮސްފައިވަނީ، ސީދާ މެންބަރ ޢަލީ ނިޝާންގެ ބެލުމުގެ ދަށުން ކަމަށާއި މިގޮތަށް ނިންމާފައިވަނީ ކައުންސިލުގެ ޖަލްސާއެއްގައިކަން ވިދާޅުވިއެވެ. އަދި މިކަމާ ގުޅޭ އެއްވެސް މައުލޫމާތެއް ކައުންސިލުގެ މެންބަރަކަށް އަދި ރައީސްގެ ހައިސިއްޔަތުން އެމަނިކުފާނަށް ލިބިފައިނުވާކަން ތަކުރާރުކުރައްވާފައި ވެއެވެ.

ހަފްލާގައި ޕީއެސްއެމްގެ އެޑިޓޯރިއަލް ކޮންޓެންޓާ ހިލާފު އަދި ނޫސްވެރިކަމުގެ އާއްމު މިންގަނޑުތަކާ ޚިލާފު ވީޑިއޯއެއް ދައްކާފައިވާއިރު، އަދަދު ނޫހުން ތައްޔާރުކުރި މިދެންނެވި ކޮންޓެންޓާއި ގުޅިގެން އެ ކޮންޓެންޓު އުފެއްދި ދުވަސްވަރު މީޑިއާ ކައުންސިލުން ވާނީ ބަޔާނެއް ނެރެފައިކަން ރައީސްގެ ބަޔާނުގައި ފާހަގަކުރެއްވިއެވެ.

"އެގޮތުން، ކެންޑިޑޭޓުންގެ އަމިއްލަ ދިރިއުޅުމާއި އޭނާގެ ޒާތީ ކަންކަމާ ބެހުމާއި، ސާބިތުކޮށްދެވެން ނެތް ތުހުމަތުތަކުގެ މައްޗަށް ނުވަތަ ހިނގައިދިޔަ ކަމެއްގެ ޙަޤީޤަތް އޮޅޭ ފަދަ ގޮތަކަށް ކެންޑިޑޭޓަކާ ބެހޭ ގޮތުން ވާހަކަދެއްކުމާއި، މީހުންގެ މެދުގައި ފިތުނައާއި ރުޅިވެރިކަން އުފެއްދުމަށް މަސައްކަތްކުރުމަކީ، ކެންޑިޑޭޓެއްގެ އިންތިޚާބީ ޙައްޤަކަށް އުނިކަން ދިނީކަމަށް ބެލެވޭނެ ކަންކަމުގެ ތެރޭގައި އިންތިޚާބުތަކާބެހޭ އާންމު ގަވާއިދުގެ 19 ވަނަ މާއްދާގެ (ށ) ގެ ދަށުން ހިމަނާފައިވާ ބައެއް ކަންކަމެވެ. އެހެންކަމުން މި މާއްދާގައި ބަޔާންކޮށްފައިވާ އެއްވެސް ކަމެއް ނުކުރުމަށް ނޫސްތަކާއި މީޑިއާތަކަށް މި ކައުންސިލުން އިލްތިމާސްކުރަމެވެ." މީޑިއާ ކައުންސިލުން ނެރެފައިވާ ބަޔާނުގައިވާކަން ރައީސް ފާހަގަކުރެއްވިއެވެ.

މިހެން މިކަން އޮއްވައި، 11 ވަނަ ނޫސްވެރިކަމުގެ އެވޯޑު ހަފުލާގައި ހަމަ އެކޮންޓެންޓު ކައުންސިލުގެ ރައީސްއަށް ވެސް އަދި ރަސްމިއްޔާތު ލައިވްކުރި ޕީއެސްއެމްއަށް ވެސް ނޭނގި ގަސްތުގައި ދެއްކުމުގައި އެވޯޑުގެ ކަންކަން އިންތިޒާމުކުރި ކައުންސިލް މެމްބަރުންގެ ޒިންމާ އޮތްކަން ފާހަގަކުރާކަމަށް ބަޔާނުގައި ވެއެވެ.

އެހެންކަމުން ކައުންސިލުގެ ރައީސްގެ ހައިސިއްޔަތުން، މެންބަރ ޢަލީ ނިޝާން ކޮށްފައިވާ ދޮގު އިލްޒާމަކީ ރާވައިގެން ހިންގާފައިވާ ކަމެއްކަމާއި މި ޢަމަލު އެންމެ ހަރުކަށި އިބާރާތުން ކުށްވެރި ކުރައްވާކަމަށް އެމްއެމްސީ ރައީސްގެ ބަޔާނުގައި ވަނީ ވިދާޅުވެފައެވެ.