ރައީސް އޮފީހުގެ އިސްތަރުޖަމާން އަދި އެންސްޕާގެ ސީއީއޯ ހީނާ ވަލީދު އިސްތިއުފާ ދެއްވުމަށް ދަ ޑިމޮކްރެޓްސްގެ ނައިބު ރައީސް މުޙައްމަދު ޝިފާޒު ގޮވާލައްވައިފިއެވެ.

އެކްސްގައި ކުރައްވާފައިވާ ޕޯސްޓެއްގައި ޝިފާޒު ވަނީ ތިންބާރު ވަކިވެފައިވާ ދައުލަތް ހިންގުމުގެ ނިޒާމު މުޅިން ނެތިގޮސްފައިވާ ކަމަށް ވިދާޅުވެފައެވެ. އަދި ދައުލަތާއި ސަރުކާރު މިއީ ވައްކަމާއި ފޭރުމުގެ ހާއްޔެއްގެ ގޮތުގައި ސިފަވާންފެށުމަކީ އަމައްލަފުޅަށް ހީނާ ވަލީދު ވެސް ވިސްނަންވެއްޖެ ކަމެއް ކަމަށެވެ.

"މިވަގުތު ސަރުކާރާ ދައުލަތުގެ ހައްގުގައި ކަމަނާ އިސްތިއުފާދެއްވަންޖެހޭ!"

ތިންބާރު ވަކިވެފައިވާ ދައުލަތް ހިންގުމުގެ ނިޒާމު މުޅިން ނެތިގޮސް، ދައުލަތާއި ސަރުކާރު މިއީ ވައްކަމާއި ފޭރުމުގެ ހާއްޔެއްގެ ގޮތުގައި ސިފަވާންފެށުމަކީ އަމައްލަފުޅަށް @MvSpokesperson ވެސް ވިސްނަންވެއްޖެ ކަމެއް. މިވަގުތު ސަރުކާރާ ދައުލަތުގެ ހައްގުގައި ކަމަނާ އިސްތިއުފާދެއްވަންޖެހޭ! https://t.co/k3AKzFjNCz

— Mohamed Shifaz *️⃣ (@MohamedShifaz_) December 23, 2024

ޝިފާޒު މިފަދައިން ވިދާޅުވެފައިވާއިރު، މިއީ އެންސްޕާއި އެޗްޑީސީގެ ހިޔާނާތުގެ މައްސަލަތަކެއް ފެންމަތިވެފައިވާ ދުވަސްވަރެކެވެ.

ހާއްސަކޮށް އެޗްޑީސީގެ ބޮޑު ހިޔާނާތުގެ މައްސަލަ ތަހުގީގުކުރަމުން އަންނައިރު، އެ ކުންފުނީގެ އެމްޑީ ފަޒުލް ރަޝީދު ވަނީ އިސްތިއުފާދެއްވާފައެވެ. އަދި އެކަމުގައި ޝާމިލުވާކަމަށް ތުހުމަތު ކުރެވޭ ފަރާތްތަކެއް ވަނީ މަސްއޫލިއްޔަތުތަކުން އެކަހެެރި ވެސް ކޮށްފައެވެ.

މީގެއިތުރުން ފެނަކަ އެމްޑީގެ މަގާމުގައި ހުންނެވި މުއާޒު މުޙައްމަދު ރަޝީދު ވެސް ވަނީ މިއަދުގެ ވަގުތެއްގައި ކުއްލިގޮތަކަށް އިސްތިއުފާ ދެއްވާފައެވެ.