ވެރިކަންކުރާ ޕާޓީ ކޮންގްރެސް ޕާޓީގެ ފޯރިގަދަ ހަރުގެ ޖަލްސާ މިރޭ އޮންނާނެކަމަށް އެ ޕާޓީން ހާމަކޮށްފިއެވެ.

މީސްމީޑިއާ ގައި ހިއްސާކޮށްފައިވާ ޕޯސްޓެއްގައި ވަނީ މި ޖަލްސާ އޮންނާނީ މިރޭ 8:45 ގައި ކޮންގްރެސް ހައުސް ކަމުގައިވާ އާޓިފިޝަލް ބީޗް ކުރިމަތީގައި ހުންނަ ހ. ވެޔޮވިލާގައި ކަމަށެވެ.

މި ޖަލްސާގައި ރައީސް ޑރ. މުޙައްމަދު މުޢިއްޒު ބައިވެރިވަޑައިގަންނަވާކަން ނުވަތަ ނޫންކަން މިހައިތަނަށް ހާމަކޮށްފައެއް ނުވެއެވެ.

ނަމަވެސް މި ދުވަސްވަރަކީ ތިން މިނިސްޓްރީއެއްގައި އަލިފާނުގެ ހާދިސާއެއް ހިނގައި، އަދި ކޮރަޕްޝަންގެ ބޮޑެތި މައްސަލަތަކެއް ފެންމަތިވެފައިވާ ދުވަސްވަރަކަށްވާއިރު، މިރޭގެ ޖަލްސާގައި މިކަމަށް ވަރަށްބޮޑަށް ވާހަކަދެކެވޭނެކަމަށް ބެލެވެއެވެ.

ހާއްސަކޮށް އެޗްޑީސީގެ ބޮޑު ހިޔާނާތުގެ މައްސަލަ ތަހުގީގުކުރަމުން އަންނައިރު، އެ ކުންފުނީގެ އެމްޑި ފަޒުލް ރަޝީދު އިސްތިއުފާދެއްވާފައިވާއިރު، އެކަމުގައި ޝާމިލުވާކަމަށް ތުހުމަތު ކުރެވޭ ފަރާތްތަކެއް ވަނީ މަސްއޫލިއްޔަތުތަކުން އެކަހެެރިކޮށްފައެވެ.

މީގެއިތުރުން ފެނަކަ އެމްޑީގެ މަގާމުގައި ހުންނެވި މުއާޒު މުޙައްމަދު ރަޝީދު ވެސް ވަނީ މިއަދުގެ ވަގުތެއްގައި ކުއްލިގޮތަކަށް އިސްތިއުފާ ދެއްވާފައެވެ.

ޕީއެންސީން ވަނީ ޕާޓީގެ އެންމެހާ ލޮބުވެތި މެންބަރުން މިހަރަކާތުގައި ބައިވެރިވުމަށް އެދިފައެވެ.