ސަރުކާރުގެ ނިންމުންތައް ހުރިގޮތުން، ލާމަރުކަޒީ ޤާނޫނަށް ޢަމަލުކުރަން ބޭނުން ނުވާކަން ފެންނަމުންދާ ކަމަށް މާލޭ ސިޓީގެ މޭޔަރ އާދަމް އާޒިމް ވިދާޅުވެއްޖެއެވެ.

އާޒިމް މިފަދައިން ވިދާޅުވީ އަންނަ އަހަރަށް ސަރުކާރުން ހުށަހެޅި ދައުލަތުގެ ބަޖެޓުގައި ކައުންސިލްތަކަށް ދޭން ކަނޑައެޅި ފައިސާ މަދުކޮށް، ގާނޫނުން ދޭން ލާޒިމް ކުރާ މިންވަރަށް ވެސް ފައިސާ ހިމަނާފައިނުވާތީ، އެކަމާ ނުރުހުން ފާޅުކުރައްވައި 'އެކްސް' ގައި ކުރެއްވި ޕޯސްޓެއްގައެވެ.

އެ ޕޯސްޓުގައި އާޒިމް ވަނީ ލާމަރުކަޒީ ގާނޫނުން ރައްޔިތުންނަށް ފޯރުކޮށްދިނުމަށް ލާޒިމްކޮށްފައިވާ ހިދުމަތްތައް ފޯރުކޮށްދިނުމަށް، ކައުންސިލްތަކުން ހުށަހެޅި ފައިސާގެ ބޮޑުބައެއް ބަޖެޓުން އުނިކޮށްފައިވާކަން ފާހަގަކުރައްވާފައެވެ. އަދި މިއީ ކައުންސިލްތަކުން ރައްޔިތުންނަށް ފޯރުކޮށްދޭންޖެހޭ ހިދުމަތްތަކުން ރައްޔިތުން މަހްރޫމްކުރުމަށް ރާވައިގެން ކުރާ ކަމެއް ކަމުގައި ވެސް ވަނީ ސިފަކުރައްވާފައެވެ.

"ލާމަރުކަރީ ގާނޫނުން ކައުންސިލްތަކުން ރައްޔިތުންނަށް ފޯރުކޮށް ދިނުމަށް ލާޒިމްކޮށްފައިވާ ހިދުމަތް ދިނުމަށް، ބަޖެޓުގައި ހިމަނާފައިވާ ފައިސާ އުނިކުރުމުގެ ބާރު، ސަރުކާރަށް ނޯންނާނެ." މޭޔަރު އާޒިމް ވިދާޅުވިއެވެ.

އެހެންކަމުން މިފަދަ ކަންކަން އިސްލާހުކުރުމަށާއި ބަޖެޓް ތައްޔާރުކޮށްފައިވަނީ ލާމަރުކަޒީ ގާނޫނާހިލާފަށް ކަމަށް ވެސް ވިދާޅުވިއެވެ. އަދި ގާނޫނާއެއްގޮތަށް ބަޖެޓް އެކުލުވާލުމަށް ވަނީ ސަރުކާރަށް ގޮވާލައްވާފައެވެ.