ސިފައިންނާ ފުލުހުން އިތުރުކުރުމަށް ގައުމީ ޕްރޮގްރާމެއް ފެށުމަށް ނިންމާފައިވާކަމަށް ރައީސް ޑރ. މުޙައްމަދު މުޢިއްޒު އިއުލާން ކުރައްވައިފިއެވެ.

އެމަނިކުފާނު މިކަން އިއުލާން ކުރެއްވީ މިއަހަރުގެ ނަސްރުގެ ދުވަހުގެ މުނާސަބާގައި ބޭއްވި ރަސްމީ ޖަލްސާގައެވެ.

ދަރުބާރުގޭގައި ބޭއްވި މި ޖަލްސާގައި ރައީސް ވިދާޅުވީ މިއީ ސްކޫލް ނިމޭ ދަރިވަރުންނަށް އަމާޒުކޮށް ހިންގެވުމަށް ނިންމަވާފައިވާ ޕްރޮގްރާމެއް ކަމަށެވެ. އަދި ސިފައިންނާއި ފުލުހުންގެ ހިދުމަތަށް ބޭނުންވާ މީހުން ތަމްރީންކުރުމަށް ސްކޫލް ނިމޭ ދަރިވަރުންގެ ތެރެއިން ވަޒީފާއެއް ނުލިބި ނުވަތަ މަތީ ތައުލީމުގެ ފުރުސަތު ނުލިބޭ ކުދިންގެ އަދަދު އުޅެނީ ދެހާހުން މަތީގައި ކަމަށެވެ.

ސިފައިންގެ އިތުރަށް ތަރައްގީކުރުމަށް ސިފައިންގެއަށް ވަންނަ މީހުންގެ އަދަދު ވެސް އިތުރުކުރަންޖެހޭކަން ފާހަގަކުރައްވައި، ވިދާޅުވީ ގައުމީ ހިދުމަތުގެ ޕްރޮގްރާމުގައި އުމުރުން 16 އަހަރުވެފައިވާ ކުދިންނަށް ބައިވެރިވެވޭނެ ކަމަށެވެ. އަދި އެކަމަށް ގާނޫނެއް ވެސް އެކުލަވާލާނެކަމަށެވެ.

މީގެއިތުރުން އެ ޕްރޮގްރާމް ހިންގެވުމަށް ބަޖެޓުގައި މިއަހަރު ވެސް 400 މިލިއަން ރުފިޔާ ހިމަނުއްވާފައިވާކަމަށާއި ކުރިއަށް އޮތްތަނުގައި ކޮންމެ އަހަރަކު ވެސް އެ ޕްރޮގްރާމަށް 400 މިލިއަން ރުފިޔާ ބަޖެޓް ކުރައްވާނެކަމަށް ރައީސް ވަނީ ވިދާޅުވެފައެވެ.