ދުނިޔޭގެ ސިޔާސީ އޮއިވަރުތައް ހިނގަމުންދާގޮތުން ރާއްޖެއަށް ކުއްލި ނުރައްކަލެއް ދިމާވުމަކީ ވެދާނޭ ކަމެއް ކަމުގައި ކުރީގެ ރައީސް އަލްއުސްތާޛު މައުމޫން އަބްދުލްގައްޔޫމް ވިދާޅުވެއްޖެއެވެ.

ނަޞްރުގެ ދުވަހުގެ މުނާސަބަތުގައި މިރޭ ބޭއްވި ރަސްމީ ޖަލްސާގައި ވާހަކަފުޅު ދައްކަވަމުން އެމަނިކުފާނު ވަނީ ދިވެހިން އަބަދު ވެސް ތިބެންވާނީ ހޭލާ ކަމަށެވެ.

ދުނިޔޭގެ ކަންތައްތައް ބަދަލުވަމުންދާގޮތުން ރާއްޖޭގެ ގައުމީ މަސްރަހަށް އަންނަ ބަދަލުތަކާއި ޒަމާނާ އެއްގޮތަށް ރާއްޖޭގެ ގާނޫނުތަކާއި ގަވާއިދުތައް ބަދަލުވެ، ރާއްޖޭގައި ސިޔާސީ ޕާޓިތަކެއް އުފެދި ހިނގަމުންދިޔަ ނަމަވެސް، އަޅުގަނޑުމެންގެ ގައުމީ ވަހުދަތަށް އެއްވެސް އުނިކަމެއް އަޔަނުދިނުމަށް ވެސް ރައީސް މައުމޫން ވަނީ އެދިވަޑައިގެންފައެވެ.

މީގެއިތުރުން އެމަނިކުފާނު ވަނީ ރާއްޖޭގެ މިނިވަންކަމާއި ސިޔާދަތު ވަރުގަދަކުރައްވައި، ދެމެހެއްޓެވުމަށް ރައީސް ޑރ. މުޙައްމަދު މުޢިއްޒު ގެންގުޅުއްވާ ސިޔާސަތަށް ޝުކުރާއި ސާބަސް ދެއްވާފައެވެ.