2025 ވަނަ އަހަރަށް ހުށަހެޅި ބަޖެޓުން ފެނިގެންދަނީ ސަރުކާރުން ރައްޔިތުންނަށް ވީ ވައުދުތައް ފުއްދޭނެ ގޮތެއް ހޯދިފައި ނެތްކަން ކަމުގައި އެމްޑީޕީގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.

'އެކްސް' ގައި ކުރެއްވި ޕޯސްޓެއްގައި ކުރީގެ ފޮރިން މިނިސްޓަރު ޝާހިދު ވަނީ، ރާއްޖޭގެ މާލީ ހާލަތު ވެސް އެނގިވަޑައިގަންނަވާކަމަށް ރައީސް ޑރ. މުޢިއްޒު އިންތިހާބުގެ ތެރޭގައި ވިދާޅުވެފައިވާ ކަމަށެވެ. އަދި ވައުދުތައް ވެސް ފުއްދަވާނެކަމުގައި ވިދާޅުވި ކަމަށެވެ.

އެހެންނަމަވެސް ވެރިކަމަށް އަހަރެއްވާން ގާތްވެފައި އޮތްވާ ހުށަހެޅުއްވި ބަޖެޓުގައި ރަނގަޅު ޕްލޭނެއް ވެސް ރޭވުންތެރިކަމެއް ނެތް ކަމަށް ޝާހިދު ވިދާޅުވިއެވެ.

މި ބަޖެޓުން ރައްޔިތުންނާއި ވިޔަފާރިތަކުން ނަގާ ޓެކްސްތައް ބޮޑުކުރީމާ އެ ފަރާތްތަކުގެ ފުއްދުންތެރިކަން ދަށްވެ، އިގްތިސާދީ ނަފާއަށް ނޭދެވޭ އަސަރު ކުރާނެ ކަމަށް ވެސް ވިދާޅުވެފައި ވެއެވެ. އަދި ޓެކްސް އާމްދަނީއާ ނުބައްދަލު މިންވަރަކަށް ޚަރަދު ބޮޑުކުރުމުން މާލީ ދެމެހެއްޓެނިވިކަން ގެއްލިގެންދާކަން ފާހަގަކުރެއްވިއެވެ.

މީގެއިތުރުން މި ބަޖެޓުގައި ރައްޔިތުންނާ ގުޅުންހުރި ހައްސާސް ބައިތަކުން ޚަރަދު ކުޑަ ކުރާނެ ކަމަށް ބުނާއިރު، ސަރުކާރުން ކުރާ އިސްރާފާއި، ސިޔާސީ މަގާމްތަކުގެ މުސާރައާއި އިނާޔަތްތަކަށް ހޭދަކުރާ މިންވަރު ކުޑަކުރަން މަސައްކަތް ކުރާ ތަނެއް ބަޖެޓުން ނުފެންނަ ކަމަށް ވެސް ޝާހިދު ވިދާޅުވިއެވެ.

އެމަނިކުފާނު އިތުރަށް ވިދާޅުވީ ދައުލަތުގެ ރިކަރަންޓް ޚަރަދު ދަނީ މައްޗަށް ކަމަށާއި އެއާއެކު، މި ބަޖެޓު ފޫބައްދަން 16.9 ބިލިއަން ރުފިޔާ ހޯދަން ޖެހޭ ކަމަށެވެ. އަދި މި ފައިސާ ހޯދާނެ ގޮތުގެ ހަރުދަނާ ރޭވުންތެރިކަމެއް ބަޖެޓުން ނުފެންނަކަމަށާއި މީގެ ބޮޑުބައި ހޯދުމަށް ޖަހާފައި އޮތީ ބޭރުގެ ކޮމަރޝަލް ބޭންކުތަކުންކަން ވެސް ފާހަގަކުރެއްވިއެވެ.

ހަމަމިއާއެކު ޒަމާންވީ ޚާރިޖީ ގުޅުންތަކަށް މި ސަރުކާރުގެ ޢަމަލުތަކުން ނޭދެވޭ އަސަރުކޮށްފައިވުމުން މި ފައިސާ ހޯދުމަށް މިހާރުވެސް ސަރުކާރުވަނީ ނުކުޅެދިފައި ކަމަށާއި މި ބަޖެޓަކުން އެކަމަކަށް ތަސައްލީއެއް ނުހޯދޭ ކަމަށް ވެސް ވިދާޅުވެފައި ވެއެވެ.