ވަންގަވް މެދުވެރިކޮށް ދިވެހިރާއްޖޭގެ ޒަކާތު ހައުސްގެ ބޭސްފަރުވާގެ އެހީއަށް އެދެވޭނެ އިންތިޒާމު ހަމަޖައްސައިފިއެވެ.

'ފުދުންތެރިކަން ނެތް ފަރާތްތަކަށް ދެވޭ ބޭސްފަރުވާގެ އެހީ" ޚިދުމަތަށް 'ވަންގަވް' މެދުވެރިކޮށް އެދެވޭނެ އިންތިޒާމް ހަމަޖައްސައި، މި ހިދުމަތް ރަސްމީކޮށް ތައާރަފްކޮށްދެއްވީ އިސްލާމިކް މިނިސްޓަރ ޑރ. މުޙައްމަދު ޝަހީމް އަލީ ސަޢީދުއެވެ.

އިސްލާމިކް މިނިސްޓްރީގައި މިއަދު ހެނދުނު މިކަމަށްޓަކައި ބޭއްވި ހާއްސަ ރަސްމިއްޔާތުގައި މިނިސްޓަރު ވިދާޅުވީ މިއީ ރައްޔިތުންނަށް ލުއިފަސޭހަކަމެއް ލިބިގެންދާނެ ޖިދުމަތަކަށް ވެގެންދާނެ ކަމަށެވެ.

މި ހިދުމަތް ތައާރަފްކުރުމަށް ޒަކާތު ހައުސްގެ މުވައްޒަފުންނާއި ޓްރޭޑްނެޓްގެ މުވައްޒަފުން ކުރެއްވި މަސައްކަތް ފާހަގަކުރައްވައި، އެކަމަށްޓަކައި އެ މުވައްޒަފުންނަށް ވަނީ ޝުކުރު އަދާކުރައްވާފައެވެ. އަދި މިފަދަ ހުރިހާ ކަމަކަށް އެ މިނިސްޓްރީގެ ފުރިހަމަ އެއްބާރުލެއްވުން ލިބޭނެކަަމަށް ވެސް ވިދާޅުވިއެވެ.

ދިވެހިރާއްޖޭގެ ޒަކާތު ހައުސްގެ ބޭސްފަރުވާގެ ހިދުމަތް ވަންގަވްއަށް ގެނެސްފައިވަނީ ރައްޔިތުންނަށް ވީހާވެސް ލުއި ފަސޭހަކަމާއި އަވަސްކަމާއެކު ހިދުމަތެއް އެދިލެއްވޭނެ އިންތިޒާމް ހަމަޖެއްސެވުމަށެވެ.

މި ހިދުމަތް ތައާރަފްކުރުމާއެކު މިއަދުން ފެށިގެން ކައުންޓަރަށް ނުވަތަ އީމެއިލް މެދުވެރިކޮށް ޒަކާތުގެ ބޭސްފަރުވާގެ އެހީއަށް އެދި ހުށައަޅާ ފޯމުތައް ބަލައިނުގަންނާނެއެވެ.

'ވަންގަވް' އަކީ ދިވެހި ސަރުކާރުގެ ޚިދުމަތްތައް ރައްޔިތުންނަށް އަވަސްކަމާއި ފަސޭހަކަމާއެކު އެއް ތަނަކުން ގެނެސްދިނުމަށް ފަރުމާކޮށްފައިވާ ޑިޖިޓަލް ޕްލެޓްފޯމްއެކެވެ.