ހިއުމަން ރައިޓްސް ޑިފެންޑަރސް ޓްރެއިނިންގ ޕްރޮގްރާމް ފަށައިފިއެވެ.

މިއީ ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗް.އާރުސީ.އެމް) އިން އިންސާނީ ހައްގުތަކަށް މަސައްކަތްކުރާ ފަރާތްތަކަށް އަމާޒުކޮށްގެން ހަތަރު ދުވަހުގެ މުއްދަތަށް ހިންގާ ތަމްރީން ޕްރޮގްރާމެކެވެ.

ނޮވެމްބަރ 4 ން 7 ވަނަ ދުވަހުގެ ނިޔަލަށް ކުރއަށްދާ މި ޕްރޮގްރާމްގެ މައިގަނޑު މަގްސަދަކީ މުޖުތަމައުގައި އެއްބަޔަކު އަނެއްބަޔަކާ ގުޅިގެން، އިންސާނީ ހައްގުތަކަށް އާންމުން ހޭލުންތެރިކޮށް، ދައުލަތް ޖަވާބުދާރީކޮށް، އިންސާނީ ހައްގުތަކަށް ވަކާލާތުކުރާ ބައެއް ބިނާކުރުމެވެ.

މި ޕްރޮގްރާމުގައި 25 ފަރާތެއް ތަމްރީނުކުރެވިގެންދާއިރު، މިއަހަރު މި ޓްރެއިނިންގ ކުރިއަށްގެންދަނީ ޓްރާސްޕޭރެންސީ މޯލްޑިވްސް (ޓީ އެމް) އަދި ޔޫއެސް އޭޖެންސީ ފޮ އިންޓަރނެޝަނަލް ޑިވެލޮޕްމެންޓް (ޔޫއެސްއެއިޑް) އެހީތެރިކަމާ އެކުގައެވެ.

ޔުނައިޓެޑް ނޭޝަންސް އޮފީސް އޮފް ދަ ހައި ކޮމިޝަނަރ ފޮރ ހިއުމަން ރައިޓްސް (OHCHR) އިން ހިއުމަން ރައިޓްސް ޑިފެންޑަރސް (އެޗް.އާރު.ޑީ) މާނަކުރަނީ މަދަނީ އަދި ސިޔާސީ ހައްގުތައް ރައްކާތެރިކޮށް ކުރިއެރުވުމާއި އިގްތިސާދީ، އިޖްތިމާއީ އަދި ސަގާފީ ހައްގުތައް ރައްކާތެރިކޮށް، އެ ހައްގުތައް ހޯދައިދިނުމަށް ސުލްހަވެރިގޮތެއްގައި މަސައްކަތްކުރާ ފަރުދުންގެ ގޮތުގައެވެ.

ހިއުމަން ރައިޓްސް ޑިފެންޑަރސް ވަކިވަކި ފަރުދުންގެ ނުވަތަ ޖަމާއަތްތަކުގެ އެއްވެސް އިންސާނީ ހައްގެއް ގެއްލިފައިވާ ކަމުގައި ވަނީނަމަ އެހައްގެއް ހޯދައިދިނުމަށް މަސައްކަތްކުރާނެއެވެ.

މި ޕްރޮގްރާމު މީގެކުރިން 2021 ވަނަ އަހަރު ކުޅުދުއްފުށި ސިޓީގައި، އަދި 2023 ވަނަ އަހަރު ފުވައްމުލަކު ސިޓީގައި ވަނީ ކުރިއަށް ގެންގޮސްފައެވެ.

މިފަދަ ޕްރޮގްރާމްތައް އިންތިޒާމް ކުރުމުގައި ކޮމިޝަނުގެ އުއްމީދަކީ ތަމްރީނުވާ ފަރާތްތަކަކީ މުޖުތަމައުގައި އެއްބަޔަކު އަނެއްބަޔަކާ ގުޅިގެން، އަދި ކޮމިޝަނާއި، ކަމާބެހޭ އެހެނިހެން އިދާރާތަކާ ގުޅިގެން އިންސާނީ ހައްގުތަކަށް އާންމުން ހޭލުންތެރިކޮށް، ހަވާސާވެފައިވާ ފަރާތްތައް ބާރުވެރިކުރުވައި، ދައުލަތް ޖަވާބުދާރީކޮށް، އިންސާނީ ހައްގުތަކަށް ވަކާލާތުކުރާ ބަޔަކަށް ވެގެންދިޔުމެވެ.