އދ. ދަނގެތީގައި ކުރިއަށްގެންދިޔަ ފަހާ ކޯސް ނިމި ބައިވެރިންނަށް ސެޓްފިކެޓް ދީފިއެވެ.

މިއީ އެއަތޮޅު އުކުޅަހު ހޯޕް ޖަމިއްޔާއާއި ޚިދުމަތް ޖަމިއްޔާ އަދި ތުރުކީގެ އުއްމަ ޖަމިއްޔާ ގުޅިގެން ކުރިއަށްގެންދިޔަ ކޯހެކެވެ.

ރާއްޖޭގެ 10 ސަރަހައްދެއްގައި ފަހަން ދަސްކޮށްދިނުމުގެ މަގްސަދުގައި ފެށި މި ޕްރޮގްރާމުގެ ދަށުން ދަނގެތީގައި ކޯސް ބާއްވާފައިވަނީ އޮކްޓޯބަރ 18 ން ނޮވެމްބަރ މަހުގެ ފުރަތަމަ ދުވަހުގެ ނިޔަލަށެވެ. މި ކޯހުގައި އެރަށުގެ 30 އަންހެން ކަނބަލުން ބައިވެރިވިއެވެ.

ވިޔަފާރީގެ އުކުޅުތައް ދަސްކޮށްދިނުމުގެ ސެޝަންތައް ވެސް މި ކޯހުގައި ހިމަނައި، ވަނީ ކިޔަވައިދީފައެވެ.

މި ކޯސް ނިންމުމުގެ ރަސްމިއްޔާތު ދަނގެތީ ޔޫތް ސެންޓަރުގައި ބޭއްވިއިރު، މި ރަސްމިއްޔާތު ޝަރަފްވެރިކޮށްދެއްވައި، ބައިވެރިންނަށް ސެޓްފިކެޓް ހަވާލުކޮށްދެއްވީ އެރަށު ސްކޫލުގެ ޕްރިންސިޕަލް އައިމިނަތު ނަތާޝާއެވެ.

މި ރަސްމިއްޔާތުގައި ޚިދުމަތް ޖަމިއްޔާގެ ފަރާތުން ވަނީ ބައިވެރިންގެ ތެރެއިން ގުރުއަތުން ނަގާ ދެ ބައިވެރިއަކަށް ފަހާފޮއްޓާއި ފަހަން ބޭނުންވާ ސާމާނު ޕެކެއް ހަދިޔާކޮށްފައެވެ.

މި ކޯހުގެ ބައިވެރިންނަށް ކިލާސްތައް ނަންގަވައިދެއްވީ ކްރިއޭޓިވް ޕްރޮޑަކްޓްސްގެ މުދައްރިބެއް ކަމުގައިވާ މަރިޔަމް ނާޝިދާއެވެ. އަދި ވިޔަފާރީގެ އުކުޅުތައް ދަސްކޮށްދޭ ކްލާސްތައް ނަންގަވައިދެއްވީ ދަ ވައިބް ޖަމިއްޔާގެ މުދައްރިބު އައިޝަތު ޝެނީން އިބްރާހިމްއެވެ.

ކޯހުގެ ބައިވެރިއެއްގެ ހައިސިއްޔަތުން ވާހަކަ ދައްކަމުން ހައްވާ ފަޒުލާ ވަނީ މީގެކުރިން އެއްވެސް ވަރަކަށް ފަހަން ނޭނގޭ އެތައް ކަނބަލުންނަކަށް އެކަން ދަސްވެފައިވާ ކަމަށެވެ. އަދި މިންނަގައި، ކަނޑައި، އަމިއްލައަށް ފަހަން ދަސްވުމަކީ ލިބޭ ވަރަށްބޮޑު އުފަލެއް ކަމަށެވެ.

މިއީ އާމްދަނީ ހޯދުމަށް ވެސް ގޭގައި ކުރެވޭނެ ކަމަކަށްވާތީ، މި ކޯހުން ދަސްވި އެއްޗެއްގެ ބޭނުން އެންމެފުރިހަމަގޮތުގައި ހުރިހައި ބައިވެރިން ވެސް ހިފާނެކަމަށް އުއްމީދުކުރާ ކަމަށް ވެސް އޭނާ ބުންޏެވެ.

ހިދުމަތް ޖަމިއްޔާ އިން ވަނީ މި ކޯސް ހިންގުމުގައި އެރަށު ކައުންސިލާއި ޑަބްލިއުޑީސީ އަދި ޖަމިއްޔަތުލް ޤަލަމުން ކޮށްދެއްވާފައިވާ ބުރަ މަސައްކަތް ފާހަގަކޮށް، އެފަރާތްތަކަށް ޝުކުރު އަދާކުރައްވާފައެވެ.

ޚިދުމަތް ޖަމިއްޔާ އިން މީގެކުރީން ވެސް ވަނީ މިފަދަ ކޯސްތައް ހިންގާފައެވެ.