ސަރުކާރުގެ އަމާޒަކީ ވަކި ސިޔާސީ ފިކުރަކަށް ނިސްބަތް ވުމުން އަސާސީ ހައްގުން މަހްރޫމުކުރުން ކަމުގައި އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

'އެކްސް' ގައި ކުރެއްވި ޕޯސްޓެއްގައި ވިދާޅުވީ ބޭސް ސިޓީއަށް ސަލާން ޖެހުން ނިމުމަކަށް ގެނެސް, ދިވެހި އައިޑީ ކާޑު ދައްކާލުމުން ރައްޔިތުންނަށް ހިލޭ ބޭސްފަރުވާ ކުރެވޭނެ ސިއްހީ ނިޒާމަކީ އެމްޑީޕީން މިރާއްޖެއަށް ގެނައި ހެޔޮ ވެރިކަމުގެ އެންމެ މުހިންމު އެއް އަސާސް ކަމަށެވެ.

މީގެއިތުރުން ދިވެހި އެއްވެސް ރައްޔިތަކު ބާކީނުކޮށް, ހެލްތު އިންޝުއަރެންސްގެ ވަށައިޖެހޭ ނިޒާމެއް އެމްޑީޕީގެ ވެރިކަމުގައި އެކުލަވާލީ އެ ކަމަކީ އެންމެހާ ރައްޔިތުން ޝާމިލް ކުރަންޖެހޭ އަސާސީ ހައްގަަކަށްވާތީ ކަމަށް ވެސް ވިދާޅުވިއެވެ.

އެހެންނަމަވެސް ދިވެހި ރައްޔިތުންގެ ތެރެއިން ބަޔަކު އާސަންދަ ނިޒާމުން ބާކީކޮށް, މި ހަރުދަނާ ނިޒާމަށް މި ސަރުކާރުން ގެންނަމުން މިދާ ބަދަލުގެ ހަގީގީ އަމާޒަކީ, ވަކި ސިޔާސީ ފިކުރަކަށް ނިސްބަތްވުމުން މި އަސާސީ ހައްގުން މަހްރޫމު ކުރުން ކަމަށް ވެސް ޝާހިދު ވިދާޅުވިއެވެ.

އެމަނިކުފާނު ވަނީ ބޭސް ސިޓީއަށް ސަލާން ޖެހުމުގެ ސަގާފަތް އިއާދަކޮށް، މުޅި ސިއްހީ ނިޒާމު ސިޔާސީ ކޮށްލުން ކަމަށް ވެސް ވިދާޅުވެފައެވެ. އަދި ބޭސްފަރުވާގެ އަސާސީ ހައްގުން ދިވެހި ރައްޔިތުން މަހްރޫމު ނުކުރުމަށް ހަރު އަޑުން ވަނީ ސަރުކާރަށް ގޮވާލައްވައި، ސިއްހީ ނިޒާމު ސިޔާސީ ކުރުން ހުއްޓައިލުމަށް ވެސް ގޮވާލެއްވިއެވެ.