ދައުލަތުގެ ބަޖެޓު ތައްޔާރުކުރުމުގައި ސަރުކާރުން ވަރަށް ގިނަ ކަންކަމަށް ވިސްނަވަައިގެން ކަމުގައި ފިނޭންސް މިނިސްޓަރުގެ ނައިބު ނައިބު އަހުމަދު ސާއިދު މުސްތަފާ ވިދާޅުވެއްޖެއެވެ.

ޕީއެންސީން ބޭއްވި 'ރައްޔިތުންގެ ސައްލާ' ގައި ވާހަކަ ދައްކަވަމުން އޭނާ ވަނީ މިއަހަރަށް ލަފާކޮށް ދައުލަތުގެ ބަޖެޓު ތައްޔާރުކުރުމުގައި ސަރުކާރުން ވަރަށް ގިނަ ކަންކަމަށް ވިސްނަވަައި، ފަންނީ ގިނަ މަސައްކަތްތަކެއް ކޮށްފައިވާކަން ފާހަގަކުރައްވާފައެވެ.

އެގޮތުން ބަޖެޓަށް އާމްދަނީ އިތުރުކުރަން އައު ގޮތްތައް ހޯދާފައިވާއިރު، އެކަންކަން ތަންފީޒުކުރާނީ ރައްޔިތުންނަށް ބުރަ ނުވާނެ ގޮތަށްކަމަށް ސާއިދު ވިދާޅުވިއެވެ. އަދި އަންނަ އަހަރުގެ ބަޖެޓުން އެންމެ ބޮޑު ތަފާތެއް ފެންނަނީ ނިޒާމީ ގޮތެއްގައި ކުރަމުން އަންނަ ހަރަދުތައް ކޮންޓްރޯލްކޮށް، ރައްޔިތުންނަށް އެންމެ ފައިދާވާނެ ގޮތަށް އެ ޚަރަދުތައް ބައްޓަންކުރުންކަމަށް ވެސް ވިދާޅުވިއެވެ.

އޭނާ ވިދާޅުވީ މީގެކުރިން ހަރަދުތައް ކުޑަކުރަން ފިޔަވަޅުތައް އަޅާ ވާހަކަ ދެއްކިނަމަވެސް އެކަން ކޮށްފައި ނެތް ކަމަށެވެ. އެކަމަކު މިފަހަރުގެ ބަޖެޓުގައި ރައީސްގެ ހުއްދައާއެކު އެކަންކަން ކުރަން ހިމަނާފައިވާނޭކަން އޭނާ ފާހަގަކުރެއްވިއެވެ.

މީގެއިތުރުން މި އަހަރުގެ ބަޖެޓަކީ އިންޓަރނޭޝަނަލް މަނިޓަރީ ފަންޑުގެ، ގަވަރމަންޓް ފައިނޭންސް ސްޓެޓިސްޓިކްސްއާ އެއްގޮތަށް ތައްޔާރުކޮށް ހުށަހެޅި ފުރަތަމަ ބަޖެޓުކަން ސާއިދު ފާހަގަކުރެއްވިއެވެ. އަދި ހަރުދަނާ އުސޫލެއްގެ ދަށުން ބަޖެޓް ތައްޔާރުކުރެވުމުން އަންނަ އަހަރު 7 ބިލިއަނެއްހާ ރުފިޔާ ސަލާމަތްކުރެވޭނެކަމަށް ވެސް ވިދާޅުވިއެވެ.