ރައްޔިތުންނާއި ގާތުން ޚިދުމަތް ދިނުމުގެ މަސައްކަތް ބައްޓަންކުރުމުގަ ކައުންސިލްތަކުން ވަރަށް ގިނަ މަސައްކަތްތަކެއް ކުރައްވާ ކަމަށް ހޯމް މިނިސްޓަރ ޢަލީ އިހްސާން ވިދާޅުވެއްޖެއެވެ.

އެމަނިކފާނު މިހެން ވިދާޅުވީ ދިވެހި ރައްޔިތެއްކަން އަންގައިދޭ އައިޑީ ކާޑު، ޕްރިންޓް ކުރުމުގެ ޚިދުމަތް ދ. ކުޑަހުވަދޫގައި ފެއްޓުމަށްޓަކައި ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

މިނިސްޓަރު ވަނީ ކައުންސިލްތަކަށް ލިބޭ އާމްދަނީއަކުން އައިޑީ ކާޑުފަދަ ހިދުމަތެއް ރައްޔިތުންނަށް ފޯރުކޮށްދިނުމަށް ނިންމަވާ ނިންމެވުމަކީ ފަސޭހަ ނިންމެވުމެއް ނޫންކަން ފާހަގަކުރައްވާފައެވެ.

އެހެންނަމަވެސް އައިޑީ ކާޑުގެ ހިދުމަތަކީ މުހިންމު ހިދުމަތެއްކަން ދ. އަތޮޅު ކައުންސިލްގެ ރައީސް އަދި މެމްބަރުންނަށް ވިސްނުމުގެ ނަތީޖާއަކީ އައިޑީ ކާޑުގެ ހިދުމަތް ދެވޭ ދެވަނަ ކައުންސިލަކަށް ކުޑަހުވަދޫ ވެގެންދިޔުންކަން ފާހަގަކުރެއްވިއެވެ.

މި ހިދުމަތް ރައްޔިތުންނަށް ފޯރުކޮށްދެވިގެން އައީ ކައުންސިލުގެ އަމިއްލަ ހަރަދުގައިކަން ފާހަގަކުރައްވައި، މިނިސްޓަރު ވިދާޅުވީ މިއީ މިލިއަނެއްހާ ފައިސާ ހަރަދުވާ މަސައްކަތެއް ކަމަށެވެ. އަދި ރައްޔިތުންގެ ހައްގުގައި މިއީ ބޮޑު ޚަރަދެއް ހިނގާ ކަމެއްކަން ވެސް ފާހަގަކުރައްވާފައެވެ.