ހަށިހެޔޮ ރާއްޖެ ޕްރޮގްރާމު އިފްތިތާހުކޮށްފިއެވެ.

ހަށިހެޔޮ މުޖުތަމައެއް ބިނާކުުރުމުގެ މަގްސަދުގައި ކުރިއަށްގެންދާ މި ޕްރޮގްރާމު އިފްތިތާހުކޮށްދެއްވީ ކުޅުދުއްފުށި ސިޓީގައި ބޭއްވި ރަސްމިއްޔާތުގައި ނައިބު ރައީސް އަލްއުސްތާޛް ހުސައިން މުޙައްމަދު ލަޠީފްއެވެ.

މި ރަސްމިއްޔާތުގައި ސްޕޯޓްސް މިނިސްޓަރ ޢަބްދުﷲ ރާފިޢު ވިދާޅުވީ މިއީ ކުޅިވަރުގެ ހަރަކާތްތައް ދެމެހެއްޓެނިވިގޮތަކަށް ކުރިއަށްގެންދިޔުމަށް ފެށި މުހިންމު މަސައްކަތަކެއް ކަމަށެވެ.

"މިއީ ސިއްހަތާއި ދުޅަހެޔޮކަމަށް މުހިންމު ފިޔަވަޅުތަކެއް އެޅޭނެ ޕްރޮގްރާމެއް." މިނިސްޓަރު ވިދާޅުވިއެވެ.

އެމަނިކުފާނު ވަނީ ސަރުކާރުގެ އަމާޒަކީ ކޮންމެ ރަށެއްގައި ވެސް ކުރިއަށްގެންދާ ކުޅިވަރުގެ ހަރަކާތްތަކަކީ އެކަމަށް ފަންނީ މީހުންނާއެކު ހިންގޭ ހަރަކާތްތަކެއް ހެދުންކަން ފާހަގަކުރައްވާފައެވެ. އަދި ކުޅިވަރާއި ކަސްރަތުން ފަންނީ ހުނަރުވެރިކަން ފުޅާކުރުމަށް އެދާއިރާއިން ޒުވާނުން ތަމްރީންކޮށް އާމްދަނީ ހޯދޭނެ ގޮތް ތަނަވަސްކޮށްދިނުމަކީ ވެސް ސަރުކާރުގެ ވައުދެއްކަން ފާހަގަކުރެއްވިއެވެ.

މިނިސްޓަރު އިތުރަށް ވިދާޅުވީ ރާއްޖޭގެ ހުރިހައި އަތޮޅަކަށް މި ޕްރޮގްރާމު ގެންދިއުމުން އެކަމުގެ ފައިދާ ކުރާނެ ކަމަށާއި އުއްމީދަކީ ޑިސެމްބަރު މަހުގެ 26 ގެ ނިޔަލަށް މި ޕްރޮގްރާމް ނިންމާލުން ކަމަށެވެ.

މި ޕްރޮގްރާމުގެ ތެރެއިން ރާއްޖޭގެ އަތޮޅުތައް 6 ޒޯން އަކަށް ބަހާލައި، ލީޑަރުން ތަމްރީންކުރުމުގެ މަސައްކަތް މިހާރު ފަށާފައިވާއިރު، އެގޮތުން ޒޯން 1ގައި ހިމެނޭ ހއ، ހދ އަދި ށ އަތޮޅުގެ ރަށްރަށުގައި ހިމެނޭ ސްޕޯޓްސް ކައުންސިލަރ އާއި ޔޫތު އެސޯސިއޭޓުން ތަމްރީން ކުރުމަށް ހަމަޖެހިފައިވެއެވެ.

ސްޕޯޓްސް ކައުންސިލަރސް އާއި ޔޫތު އެސޯސިއޭޓުންގެ ޒިންމާތަކާއި އެމީހުންގެ ރޯލަކީ ކޮބައިކަމާއި ކުޅިވަރާ ބެހޭ ވުޒާރާގެ މެންޑޭޓުގައިވާ ކަންތައްތަކަކީ ކޮބައިކަން ހިއްސާކޮށް އަހުލުވެރިކުރުމަށް ވަނީ ހަމަޖެހިފައެވެ.