ވަކިދާއިރާއަކުން ހިދުމަތް ކުރަން މަޖުބޫރުކުރުމަކީ ޑިމޮކްރަޓިކް ނިޒާމާއި ބީރައްޓެހި ގޮތެއް ކަމުގައި ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި މިވަނީ ސިފައިންނާއި ފުލުހުން އިތުރުކުރުމަށް ގައުމީ ޕްރޮގްރާމެއް ފެށުމަށް ނިންމާފައިވާކަމަށް ރައީސް ޑރ. މުޙައްމަދު މުޢިއްޒު އިއުލާން ކުރައްވާފައިވާތީ އެކަމަށް އިޝާރާތް ކުރައްވާ އެކްސްގައި ކުރެއްވި ޕޯސްޓެއްގައެވެ.

ރައީސް ޑރ. މުޢިއްޒު އެކަން އިއުލާން ކުރެއްވީ މިއަހަރުގެ ނަސްރުގެ ދުވަހުގެ މުނާސަބާގައި ދަރުބާރުގޭގައި ބޭއްވި ރަސްމީ ޖަލްސާގައެވެ.

ރައީސްގެ އެ ވާހަކަފުޅާއި ގުޅިގެން ޝާހިދު ވިދާޅުވީ ސަލާމަތީ ހިދުމަތްތައް ޒަމާނާ އެއްގޮތަށް ތަރައްގީކޮށް ކުރިޔަށް ގެންދެވޭނީ އިލްމީ، ގާބިލު ޒުވާނުންނަށް ވެސް އެހިދުމަތް ކުރުމަށް ފުރުސަތު ލިބިގެން ކަމަށެވެ.

މީގެއިތުރުން އޯލެވެލް ގައި ރަގަޅު ނަތީޖާއެއް ހާސިލު ނުވާ ކުދިންނަށް، އެކުއްޖެއްގެ ޝައުގުވެރިކަން ހުރި ދާއިރާއަކުން އިތުރު ތަމްރީނާއި ހުނަރުތައް ލިބޭނޭމަގު ފަހިކޮށްދީ ގައުމުގެ ތަރައްގީގައި ބައިވެރިވެ ޝާމިލުވެވޭ ގޮތަށް ޖާގަ އޮތުމަކީ އެފަދަ ޒުވާނުންގެ އުންމީދުތަކުގައި ހަގީގީ ކުލަޖެހިގެންދާނޭ މަގު ކަމަށް ވެސް ވިދާޅުވިއެވެ.

ހަމަމިއާއެކު ރާއްޖޭގެ އަދުގެ ހަގީގީ ހާލަތަކީ އެއްވެސް މަޖުބޫރުކަމެެއްނެތި ސަލާމަތީ ހިދުމަތްތަކުން ފުރުސަތަށް އެދި އެތަށް ހާސް ޒުވާނުނެއް ވަޒީފާއަކަށް އެދި އެދި ތިބިކަން ކަމުގައި ޝާހިދު ވިދާޅުވިއެވެ.

އެމަނިކުފާނު ވިދާޅުވީ އުފެއްދުންތެރި ޖީލެއް ބިނާކުރުމަށް އޮތް ރަނގަޅު ގޮތަކީ ޒުވާނުނުންގެ ހުނަރުތައް ތަރައްގީ ކުރުމަށް މަގުފަހިކޮށްދީ، ވަސީލަތްތައް ހޯދައިދީ، ފުރުސަތު އިތުރުކޮށްދިނުން ކަމަށެވެ.