ގައުމު މި ދަނޑިވަޅު އޮންނަން ޖެހުނު ހާލަތަކީ ރައްޔިތުންގެ ފައިދާ ނަހަމަގޮތުގައި ބަޔަކު ހިފުމުގެ ސަބަބުންކަމަށް ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ "ހަށިހެޔޮ ރާއްޖެ" ޕްރޮގްރާމް ފެށުމަށްޓަކައި ކުޅުދުއްފުށި ސިޓީގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅުދައްކަވަމުންނެވެ.

މި ރަސްމިއްޔާތުގައި ނައިބު ރައީސް ވިދާޅުވީ ރައީސް ޑރ. މުޙައްމަދު މުޢިއްޒުގެ އެންމެބޮޑު އަމާޒަކީ ރާއްޖޭގެ އިގްތިސާދު ވެއްޓެމުންދިޔަ ފުން އަނދަވަޅުން ސަލާމަތްކުރުން ކަމުގައެވެ. އަދި ރައީސްގެ މަސައްކަތްޕުޅާއެކު އިގްތިސާދު ކުރިއެރުވުމަށް ކާމިޔާބު މަސައްކަތްތަކެއް ފަށައި، ކަންކަން ހަމަމަގަށް އެޅެމުންދާ މަންޒަރު ފެންނަމުންދާ ކަަމަށް ވެސް ވިދާޅުވިއެވެ.

އެހެންނަމަވެސް މިހާރު ގައުމަށް އާމްދަނީ ލިބޭނެ އެތައް މަގެއް ފަހިވަމުންދާކަން ފާހަގަކުރެއްވިއެވެ. އެހެންކަމުން ރައްޔިތުންނަށް އުފާވެރި އަދި ފާގަތި ދުވަސްތަކެއް ކުރިއަށްއޮތްތަކުގައި އަދުގެ ސަރުކާރުން ހޯދައިދޭނެކަމަށް ވިދާޅުވިއެވެ.

މީގެއިތުރުން އިގްތިސާދަށް ދިރުން އަންނަމުންދާވަރަކުން ރަށްރަށުގައި މިހާރު ނުނިމި ހުރި މަޝްރޫއުތައް ވެސް ނިންމާނެކަން ފާހަގަކުރައްވައި، ނައިބު ވަނީ އޭރުން އައު މަޝްރޫއުތައް ވެސް ފަށާނެ ކަަމަށެވެ.