ރާއްޖޭގައި ހުންނަ ޗައިނާ އެމްބަސީން އެޑިޔުކޭޝަން މިނިސްޓްރީ އަށް އޭސީ ހަދިޔާކޮށްފިއެވެ.

ސެންޓަރ ފޮރ ހަޔަރ ސެކަންޑަރީ އެޑިޔުކޭޝަން (ސީ.އެޗް.އެސް.އީ) – ހުޅުމާލޭގައި ނޮވެމްބަރ 5 ވަނަ ދުވަހު ބޭއްވި ރަސްމިއްޔާތެއްގައި މި އޭސީތައް މިނިސްޓްރީއާ ހަވާލުކޮށްދެއްވީ ޗައިނާއިން ރާއްޖެއަށް ކަނޑައަޅާފައި ހުންނަވާ އެމްބެސެޑަރު ވަންގް ލިޝިންގް އެވެ. މިނިސްޓްރީގެ ފަރާތުން އޭސީތަކާ ހަވާލުވެވަޑައިގަތީ މިނިސްޓަރ ޑރ. އިސްމާޢީލް ޝަފީޢުއެވެ.

މި ރަސްމިއްޔާތުގައި އެޑިއުކޭޝަން މިނިސްޓަރ ވަނީ "ކޫލް ސްކޫލް" ޕްރޮޖެކްޓައް ޗައިނާ ސަރުކާރުން ދެއްވި އެހީތެރިކަން ފާހަގަކުރައްވާފައެވެ. އަދި މިއީ ދެ ގައުމުގެ ދެމެދުގައި އޮތް އެކުވެރިކަމުގެ ގާތް ގުޅުން ރަމްޒުކޮށްދޭ ކަމެއްކަމުގައި ވިދާޅުވިއެވެ.

މީގެއިތުރުން "ކޫލް ސްކޫލް" ޕްރޮޖެކްޓަކީ ރައީސް ޑރ. މުޙައްމަދު މުޢިއްޒުގެ ލަފާފުޅާއެކު، ބްރޭންޑެއްގެ ގޮތުގައި ފެށި ޕްރޮޖެކްޓެއް ކަމަށް ވެސް ވިދާޅުވިއެވެ.

މި ޕްރޮޖެކްޓުގެ ކޮންސެޕްޓަކީ ދަރިވަރުންނަށް ހިތްފަސޭހަކަން ހޯދައިދިނުންކަމަށާއި އެގޮތުން ކޮންމެ ސުކޫލެއްގެ އަމާޒަކަށް ވެގެން ދާނީ "ކޫލް" މާހައުލެއްގައި ހިތްހަމަޖެހޭ މަސައްކަތްތަކެއްކޮށް، ދަރިވަރުންނާއި ޓީޗަރުންގެ ތެރޭގައި ގުޅުން ރަނގަޅުވެގެން ދިޔުންކަމަށް މިނިސްޓަރ ވިދާޅުވިއެވެ.

މިނިސްޓަރ އިތުރަށް ވިދާޅުވީ ސުކޫލެއް ކާމިޔާބުވުމުގައި އެންމެ ބޮޑު އެއް އަސާސަކީ ކޮމިއުނިޓީ ސުކޫލް ޕާޓްނަރޝިޕްކަމަށެވެ. އަދި މިއީ ހަމައެކަނި ސުކޫލަށް ތަކެތި ދިނުން ކަމަށާއި އޭގެތެރޭގައި ސުކޫލުގެ ޓީޗަރުންނަށް ބޭނުންވާ ގަދަރާއި އިހުތިރާމް ދިނުމާއި، ސުކޫލްގެ އިސްވެރީންނަށް އެއްބާރުލުން ދިނުން ހިމެނޭކަމަށް ވެސް ވިދާޅުވިއެވެ.

ޗައިނާގެ ސަފީރު ވަނީ ޗައިނާއާއި ދިވެހިރާއްޖެއާ ދެމެދު އޮންނަ ގާތް ގުޅުން ފާހަގަކުރައްވައި، މި މަޝްރޫއުގެ ސަބަބުން ރާއްޖޭގެ ތައުލީމީ ދާއިރާއަށް ހެޔޮ ބަދަލެއް ގެނެސްދޭނެކަމަށް އުންމީދުކުރައްވާ ކަމަށް ވިދާޅުވެފައެވެ.