މާލެ އާއި ވިލިމާލޭގެ މަގުތައް ތަރައްގީކުރުމުގެ ފީސިބިލިޓީ ސްޓަޑީ ހެދުމަށް ޗައިނާގެ ޓީމެއް ރާއްޖެ އައިސް އެ މަސައްކަތް ފަށައިފިއެވެ.

ކޮންސްޓްރަކްޝަން މިނިސްޓްރީން ވިދާޅުވީ އެ މަސައްކަތަށް ޗައިނާ ސަރުކާރުން އައްޔަންކުރި އެކްސްޕާޓުންގެ ޓީމު ރާއްޖެ އައިސްފައިވަނީ ނޮވެމްބަރ 3 ވަނަ ދުވަހު ކަމަށެވޗެ. އަދި އެ ޓީމުގެ މަސައްކަތް މިހާރުފަށާފައިވާ ކަމަށެވެ.

މީގެއިތުރުން އެޓީމުން މި މަހުގެ 5 ވަނަ ދުވަހުން ފެށިގެން 21 ވަނަ ދުވަހުގެ ނިޔަލަށް ސްޓޭކްހޯލްޑަރުންގެ މަޝްވަރާތަކާއި، ސައިޓް ސަރވޭތަކާއި ޑޭޓާ އެއްކުރުމުގެ މަސައްކަތް ކުރިއަށް ގެންދާނެ ކަމަށް ވެސް ވަނީ ވިދާޅުވެފައެވެ.

މަގުތައް ހަދާނެ ޑިޒައިން އަދި މަގުތައް ހެދުމުގައި ޢަމަލު ކުރާނެ މައިގަނޑު އަސާސްތައް ކަނޑައެޅޭނީ ފީސިބިލިޓީ ސްޓަޑީއަށް ބިނާކޮށްގެން ކަމަށް އެ މިނިސްޓްރީން ވިދާޅުވެއެވެ.

މާލެ އާއި ވިލިމާލޭގެ މަގުތައް ތަރައްގީކުރުމަށް ޗައިނާ ސަރުކާރާއެކު ލެޓަރ އޮފް އެކްސްޗޭންޖުގައި ސޮއިކޮށްފައިވަނީ ބެއިޖިންގ ގައި ބޭއްވި ރަސްމިއްޔާތެއްގައެވެ. މިއީ ޗައިނާ ސަރުކާރުގެ ހިލޭ އެހީގެ ދަށުން ކުރިއަށް ގެންދާ މަޝްރޫއެކެވެ.