ރާއްޖެ އޮތީ އެމެެރިކާ އާ ގުޅިގެން ދުނިޔޭގެ ސުލްހައާއި ކުރިއެރުމަށް ގުޅިގެން މަސައްކަތް ކުރަން ތައްޔާރަށް ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ އެމެރިކާގެ ރިޔާސީ އިންތިޚހާބު ކާމިޔާބުކުރެއްވި އެ ގައުމުގެ ކުރީގެ ރައީސް ޑޮނަލްޑް ޓްރަމްޕަށް މަރުހަބާ ދަންނަވައި، ފޮނުއްވި މެސެޖުގައެވެ.

އެމަނިކުފާނުގެ މެސެޖުގައި ޓްރަމްޕަށް މަރުހަބާ ދަންނަވައި، ވިދާޅުވީ ރާއްޖެއާއި އެމެރިކާއާ ދެމެދު އޮތް ވަރުގަދަ ގުޅުމަކީ އިހުތިރާމާއި އެއްގައުމުން އަނެއް ގައުމުގެ ކަންކަން ދެނެގަތުމުގެ މައްޗަށް އެކުލެވޭ ގުޅުމެއް ކަމަށެވެ.

މީގެއިތުރުން ދެ ގައުމުގެ އެއްބާރުލުން އިތުރަށް ހަރުދަނާކޮށް، ދުނިޔޭގެ ސުލްހައާއި ކުރިއެރުމަށް ގުޅިގެން މަސައްކަތް ކުރަން ތައްޔާރަށް ހުންނެވި ކަމަށް ވެސް ވިދާޅުވިއެވެ.

މިހައިތަނަށް ގުނާފައިވާ ޕޮޕިއުލަރ ވޯޓުން ދައްކާ ނަތީޖާގައި އިލެކްޓޯރަލް ކޮލެޖުގެ އިލެކްޓަރުންގެ ތެރެއިން 267 އިލެކްޓަރުންވަނީ ޓްރަމްޕަށް ވޯޓު ދެއްވާފައެވެ. ދެން އޭނާ ހޯއްދަވަން ޖެހޭނީ ތިން އިލެކްޓަރުންގެ ވޯޓެވެ.

އެމަނިކުފާނާ ވާދަކުރައްވާ މިހާރުގެ ނައިބު ރައީސް ކަމަލާ ހެރިސްއަށް ލިބިވަޑައިގަތީ 224 އިލެކްޓަރުންގެ ވޯޓެވެ. އިންތިޚާބު ކާމިޔާބުކުރުމަށް ހެރިސް އަދި އިލެކްޓަރުންގެ 56 ވޯޓު ހޯއްދަވަން ޖެހޭނެއެވެ.