ޗައިނާ އިން ރާއްޖެއަށް ކޮމްޕިއުޓަރާއި ލެޕްޓޮޕް ހަދިޔާކޮށްފިއެވެ.

އެގައުމުން ރާއްޖެއަށް 80 ކޮމްޕިޔުޓަރާއި 20 ލެޕްޓޮޕް ހަދިޔާކޮށް، މި އާލާތްތަކާ ހަވާލުވުމަށް ފޮރިން މިނިސްޓްރީއާއި ރާއްޖޭގައި ހުންނަ ޗައިނާގެ އެމްބަސީއާ ދެމެދު ވަނީ ފަހމުނާމާއެއްގައި ސޮއިކޮށްފައެވެ.

މި ފަހުމުނާމައިގާ ރާއްޖޭގެފަރާތުން ސޮއިކުރެއްވީ މިނިސްޓަރ ޑރ. ޢަބްދުﷲ ޚަލީލެވެ. ރާއްޖޭގައި ހުންނަ އެމްބަސީގެ ފަރާތުން ސޮއިކުރެއްވީ އެގައުމުން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގް ލިޒިންއެވެ.

މި ރަސްމިއްޔާތުގައި މިނިސްޓަރު ވިދާޅުވީ މިތަކެތީގެ ސަބަބުން ރާއްޖޭގެ ޓެކްނިކަލް ދާއިރާ ކުރިއެރުވުމަށް މަގު ފަހިވާނެ ކަމަށެވެ. އަދި ރައްޔިތުންނަށް ފޯރުކޮށްދޭ ޑިޖިޓަލް ހިދުމަތްތައް ތަރައްގީކުރުމަށް ޗައިނާއިން ވެދެއްވި އެހީތެރިކަން މުހިންމު ދައުރެއް އަދާކުރާނެކަމަށް ވެސް ވިދާޅުވިއެވެ.

މީގެއިތުރުން މި އެހީއަކީ ދެ ގައުމުގެ ދެމެދުގައި އުފެދިފައިވާ ގާތްގުޅުން ވަރަށްބޮޑަށް ރަމްޒުކޮށްދޭ ކަމަށާއި އެގައުމުން އަބަދުވެސް ރާއްޖެއަށް އެކި ދާއިރާތަކުން އެހީތައް ފޯރުކޮށްދެމުން އަންނަކަން ފާހަގަކުރެއްވިއެވެ.

"މިފަދަ އެހީތައް ރާއްޖެއަށް ފޯރުކޮށްދިނުމުގައި ޗައިނާގެ ސަފީރުކުރައްވާ މަސައްކަތަށް ޝުކުރު އަދާކުރަން." މިނިސްޓަރު ވިދާޅުވިއެވެ.

ޗައިނާގެ ސަފީރު ވަންގް ލިޒިން ވިދާޅުވީ ދެގައުމުގެ ގުޅުން އުފެދިފައިވަނީ އިހްތިރާމުގެ މައްޗަށް ކަމަށާއި މި ގުޅުމުގެ ދަށުން ރާއްޖެއަށް ގިނަ އެހީތަކެއް މިހާރުވެފައިވާ ކަމަށެވެ. އަދި މުސްތަގުބަލުގައި ވެސް އެކި ދާއިރާ އިން އެހީތެރިކަން ފޯރުކޮށްދެއްވާނެކަމަށް ވިދާޅުވިއެވެ.