މޯލްޑިވްސް މީޑިއާ ކައުންސިލް (އެމްއެމްސީ) ގެ ނައިބު ރައީސްގެ މަގާމުގައި ހުންނެވި ހުސައިން ޝަރީފް އެ މަގާމުން އިސްތިއުފާ ދެއްވައިފިއެވެ.

އޭނާ އެ މަގާމުން އިސްތިއުފާދެއްވާފައިވަނީ ނޮވެމްބަރ 13 ވަނަ ދުވަހުއެވެ. އަދި އެ އިސްތިއުފާ ވަނީ ބަލައިގެން، ހުސައިންގެ ބަދަލުގައި ވަނީ ނައިބު ރައީސްގެ މަގާމަށް މެމްބަރަކު އިންތިހާބުކޮށްފައެވެ.

އެގޮތުން ނައިބުގެ މަގާމަށް އިންތިހާބުކޮށްފައިވަނީ "ވަން އޮންލައިން" ގެ ސީނިއަރ ޑެޕިއުޓީ އެޑިޓަރު މުހައްމަދު ސިމާއު އެވެ.

އެމްއެމްސީގެ މިއަހަރުގެ ހަތް ވަނަ ދައުރުގެ 46 ވަނަ ޖަލްސާގައި ނެގި ސިއްރު ވޯޓަކުން ސިމާއު އެ މަގާމަށް އިންތިހާބުކޮށްފައިވަނީ 10 މެންބަރުންގެ އިއްތިފާގުންނެވެ.

މޯލްޑިވްސް މީޑިއާ ކައުންސިލް (އެމްއެމްސީ) ގައި ހިމެނިވަޑައިގަންނަވަނީ ޖުމްލަ 15 މެމްބަރުންނެވެ. އެއީ މީޑިއާތަކުން 8 މެމްބަރުންނާއި އާއްމުންގެ ތެރެއިން ހަތް މެމްބަރުންނެވެ.

ހުސެއިން ޝަރީފް، އެ ކައުންސިލުން އިސްތިއުފާދެއްވުމުން އެ ކައުންސިލްގައި މީޑިއާތައް ތަމްސީލު ކުރައްވަން މިހާރު ތިއްބަވަނީ މުހައްމަދު ސިމާއު (ވަން އޮންލައިން)، އަހުމަދު އާޒިފު (ސަން އޮންލައިން)، މުހައްމަދު އަފްރާހު (ތިލަދުން)، މޫސާ ރަޝީދު (މިހާރު)، އަހްމަދު މުސްތޮފާ (ޕީއެސްއެމް) އެވެ. އަދި އަލީ ނިޝާން (އާފަތިސް އޮންލައިން)، އަލީ އާދަމް (ޚަބަރު އޮންލައިން) އެވެ.

އަމިއްލަގޮތުން ހޮވިވަޑައިގެން މިވަގުތުތިއްބެވީ ފާތިމަތު ޝާޒްލީއާއި މުހައްމަދު ނަސީރުއާއި އަލީ ރަޝީދު އިބްރާހިމްއާއި އަލީ އިސްމާއީލްއާއި އަހުމަދު މިޒްމާދު އާއި އާމިނަތު ޒިހާނާ އަދި އާއިޝަތު ހަސަން އެވެ.