ފަލަސްތީނުގެ ހައްގުތައް ބައިނަލްއަގްވާމީ މައިދާނުގައި ކުރިއެރުވުމަށް ރާއްޖޭގެ ފުރިހަމަ އެއްބާރުލުން ލިބޭނެކަމުގެ ޔަގީންކަން ރާއްޖޭގެ ފޮރިން މިނިސްޓަރ ޑރ. ޢަބްދުﷲ ޚަލީލް ދެއްވައިފިއެވެ.

އެމަނިކުފާނު މި ޔަގީންކަން ދެއްވީ ފަލަސްތީނުގެ މިނިވަންކަން އިއުލާންކުރި ދުވަހުގެ އަހަރީ މުނާސަބަތުގައި އެ ގައުމުގެ ބޮޑު ވަޒީރާއި ޚާރިޖީ ވަޒީރު، މުޙައްމަދު މުސްތަފާއަށް، ރާއްޖޭގެ ފޮރިން މިނިސްޓަރ ޑރ. ޢަބްދުﷲ ޚަލީލް ފޮނުއްވި ތަހުނިޔާގެ މެސެޖެއްގައެވެ.

އެ މެސެޖުގައި ފަލަސްތީނުގެ ރައްޔިތުން މިނިވަން މުސްތަގިއްލު ދައުލަތެއް ގާއިމުކުރުމަށް ކުރާ މިންނެތް މަސައްކަތަށް ރާއްޖޭގެ ފުރިހަމަ ތާއީދު އަބަދު ވެސް އޮންނާނޭކަން ވަނީ ހާމަކުރައްވާފައެވެ. އަދި ފަލަސްތީނުގެ ހައްގުތައް ބައިނަލްއަގްވާމީ މައިދާނުގައި ކުރިއެރުވުމަށް ރާއްޖޭގެ ފުރިހަމަ އެއްބާރުލުން ލިބޭނޭކަމުގެ ޔަގީންކަން އަރުވާފައި ވެއެވެ.

މީގެއިތުރުން ދެ ގައުމުގެ ދެމެދުގައި އޮންނަ އެއްބައިވަންތަކަމާއި އަޚުވަންތަކަމުގެ ގުޅުން އިތުރަށް ބަދަހިކުރުމަށް ރާއްޖެއިން ސާބިތުކަމާއެކު މަސައްކަތްކުރަމުން ގެންދާނޭކަމުގެ ޔަގީންކަން ވެސް އަރުވާފައި ވެއެވެ.