ގަވާއިދާ ހިލާފަށް އުޅުނު 25 ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށް އެ އިދާރާ އިން ވިދާޅުވެއްޖެއެވެ.

މޯލްޑިވްސް އިމިގްރޭޝަނުން ވިދާޅުވީ މިއީ އިމިގްރޭޝަން ވޮޗަށް ލިބިފައިވާ މައުލޫމާތަކާ ގުޅިގެން މާލޭގެ ދެ ސަރަހައްދެއް ބަލައި ފާސްކޮށް، އެ އިދާރާގެ ބެލުމުގެ ދަށަށް ގެންދިޔަ މީހުން ކަމަށެވެ. އަދި އެއީ ގަވާއިދާ ހިލާފަށް އުޅޭ ބިދޭސީން ގިނަކަމަށް "އިމިގްރޭޝަން ވޮޗް" އަށް ލިބުނު މައުލޫމާތާއި ގުޅިގެން ހިންގި ހާއްސަ އޮޕަރޭޝަނެއް ކަމަށެވެ.

އެގޮތުން މާލޭގެ ލޯކަލް މާރުކޭޓާއި ހީނާމާގޭ ޕާކިންގ ސަރަހައްދަށް ހާއްސަ ޓާސްކުފޯހުން ހާއްސަ ރެއިޑު އޮޕަރޭޝަނެއް ހިންގައި، އެ ދެ ސަރަހައްދުން 137 ބިދޭސީން ބަލައި ފާސްކޮށްފައިވާ ކަމަށް ވިދާޅުވިއެވެ.

ޑިސެމްބަރ 24 ވަނަ ދުވަހު ވެސް އިމިގްރޭޝަނުން ވަނީ މާރުކޭޓް ސަރަހައްދުގައި ނުގަވައިދުން އުޅޭ ބިދޭސީން ގިނަކަމަށް މައުލޫމާތު ލިބުމުން އެ ސަރަހައްދުގައި ހަރަކާތްތެރިވި 148 ބިދޭސީއަކު ބަލައި ފާސްކޮށްފައެވެ. އަދި ގަވާއިދާ ހިލާފަށް އުޅުނު ބިދޭސީ 22 ފިރިހެނަކާއި، ބިދޭސީ އަންހެނަކު އެ އިދާރާގެ ބެލުމުގެ ދަށަށް ގެންގޮސްފައެވެ.

މީގެ ކުރިން ވެސް އިމިގްރޭޝަނުން މަސް މާރުކޭޓު ސަރަހައްދު ބަލައި، ގަވައިދާ ހިލާފަށް އުޅެމުން ދިޔަ ބިދޭސީންތަކެއް އަތުލައިގަނެފައިވާއިރު، އެ ސަރަހައްދަކީ ގިނަ އަދަދަކަށް ބިދޭސީން އުޅޭ ސަރަހައްދެކެވެ.