ރާއްޖޭގެ ސިއްހީ ދާއިރާގެ ޕްލޭން ނުވަތަ ހެލްތު އާކިޓެކްޗަރ ބްލޫ ޕްރިންޓް އެކުލަވައިލުމުގެ މަސައްކަތް ކުރަމުންދާ ކަމަށް ހެލްތު މިނިސްޓަރ ޢަބްދުﷲ ނާޒިމް އިބްރާހިމް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ މޯލްޑިވްސް އިންޓަގްރޭޓެޑް ހެލްތު އިންފޮރމޭޝަން ސިސްޓަމް (މިހިސް) ޕަބްލިކް ޕޯޓަލް އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

މިނިސްޓަރު ވަނީ އެ ޕްލޭން އަންނަ އަހަރުގެ މެދުތެރޭގައި ތަންފީޒު ކުރެވޭނެ ކަމަށްވެސް ވިދާޅުވެފައެވެ. އަދި މިއީ ރާއްޖެ އުފެދިފައި އޮންނަގޮތުން ކުދި އާބާދީތަކަށް ފޯރުކޮށްދޭ ސިއްހީ ހިދުމަތުގެ ފެންވަރު ރަނގަޅުކުރުމަށް މިއީ އެޅިގެންދިޔަ މުހިންމު ފިޔަވަޅެއް ކަމަށެވެ.

"މި ބްލޫ ޕްރިންޓް އެކުލަވާލައި ތަންފީޒު ކުރެވެންފެށުމުން ކޮންމެ ރައްޔިތަކަށް އެ ރައްޔިތެއްގެ މުހިންމު ސިއްޙީ މައުލޫމާތުތަކަށް އެންމެ ތުއްތު އިރުން ފެށިގެން ރައްކާތެރިގޮތަކަށް ފަސޭހައިން އެކްސެސް ލިބޭނެ މަގުފަހިވެގެންދާނެ."

މިނިސްޓަރު އިތުރަށް ވިދާޅުވީ އޭގެނަތީޖާއަކަށްވާނީކޮންމެ ރައްޔިތަކަށް ވެސް އެ ރައްޔިތެއްގެ އަމިއްލަ ސިއްހީ މައުލޫމާތުތަކަށާއި ބަލީގެ ހުރި އިތުރު ހިރާސްތަކަށް ރިއާޔަތްކޮށް ބަލި ޖެހުމުގެ ކުރިން އެބަލިތަކުން ރައްކާތެރިވުމަށް އަޅަންޖެހޭ ފިޔަވަޅުތައް އެޅުން ކަމަށެވެ.