މާލެ ވޯޓަރ އެންޑް ސުވަރެޖް ކޮމްޕެނީ (އެމްޑަބްލިއުއެސްސީ) ގެ ޑެޕިއުޓީ މެނޭޖިންގ ޑިރެކްޓަރުގެ މަގާމުގައި ހުންނެވި މުޙައްމަދު ފަޒީލް ރަޝީދު ފޯނު ފުލުހުން ގެންގޮސްފިއެވެ.

ދިވެހި ފުލުހުންގެ ހިދުމަތުން ވިދާޅުވީ ފަޒީލް ރަޝީދުގެ ފޯނު ހިފަހައްޓާފައިވަނީ އެ އިދާރާ އިން ތަހުގީގުކުރަމުންދާ ބިންވެރިޔާ ހައުސިންގ ސްކީމާއި ގުޅުންހުރި މައްސަލާގައި ކަމަށެވެ. އަދި އޭނާގެ ފޯނު ހިފެހެއްޓީ ކޯޓު އަމުރެއްގެ ދަށުން ޑިސެމްބަރ 25 ވަނަ ދުވަހު ކަމަށެވެ.

ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާ ގުޅޭގޮތުން ފުލުހުން ކުރިއަށްގެންދާ ތަހުގީގަކަށް ފުރިހަމައަށް ޖާގަދީ، އެހީތެރިވުމުގެ ގޮތުން އެމްޑަބްލިއުއެސްސީން ވަނީ އޭނާ މަގާމުން ސަސްޕެންޑްކޮށްފައެވެ. އަދި ހުރިހައި ޒިންމާތަކުން ވެސް ވަނީ އެކަހެރިކޮށްފައެވެ.

އޭނާ ސަސްޕެންޑްކުރީ ކުންފުނީގެ ބޯޑުން ކަމަށް ވެސް އެމްޑަބްލިއުއެސްސީން ވަނީ ވިދާޅުވެފައެވެ.