ރާއްޖޭގައި ފުރަތަމަ ފަހަރަށް ވުދޫވި ވީލްޗެއަރ އެސޯސިއޭޝަންގެ ހިންގާ ކޮމެޓީ އަށް މެމްބަރުން އިންތިހާބުކޮށްފިއެވެ.

މި އިންތިހާބު ބާއްވާފައިވަނީ ނޮވެމްބަރ 15 ވީ ހުކުރު ދުވަހު، ހުޅުމާލޭ ސަލާޙުއްދީން ސްކޫލުގައި ބޭއްވި ހަފުލާއެއްގައެވެ.

ވީލް ޗެއަރ އެސޯސިއޭޝަންގެ ޗެއަރޕާރސަންއަކަށް އަޙްމަދު ނަޖީބު އިންތިހާބުކުރިއިރު، ވައިސް ޗެއަރޕާރސަން އަކަށް އިންތިހާބުވީ ޙައްވާ މިޒުނާއެވެ. ސެކްރެޓަރީ ޖެނެރަލްގެ މަގާމަށް އިންތިހާބުކުރީ އަޙްމަދު ޢަބްދުﷲ އެވެ.

މީގެއިތުރުން ޓްރެޝަރަރގެ މަގާމަށް އަޙްމަދު ޖަމޫމް ޖާން ޝާހު އަދި މީޑިއާ ކޯޑިނޭޓަރއަކަށް ޢަބްދުލް ބާއިސް ޢަލީ ވަނީ އިންތިހާބުކޮށްފައެވެ.

ވީލްޗެއަރ އެސޯސިއޭޝަން ނުވަތަ (WAM) އާއި ވާސޯ މެޑިކަލް ސެންޓަރު ގުޅިގެން ކުރިއަށްގެންދިޔަ މި ހަފުލާ ޝަރަފްވެރިކޮށްދެއްވީ ރައްޔިތުންގެ މަޖިލީހުގެ ހުޅުމާލޭ އުތުރު ދާއިރާގެ މެމްބަރު ޙުސައިން ޝަރީފްއެވެ.

މި ހަފުލާއަށް ފަހު، ވާސޯ މެޑިކަލް ސެންޓަރުން 'އޮއިވަރު' އަށް ވިދާޅުވީ އެ ސެންޓަރަކީ ހާއްސަ އެހީއަށް ބޭނުންވާ ފަރާތްތަކަށް ހިލޭ ސާބަހަށް ބޭސްފަރުވާގެ ގިނަ ކަންތައްތަކެއް ކޮށްދެމުން އަންނަ ތަނަކަށްވާއިރު، ވީލްޗެއަރ އެސޯސިއޭޝަނާއެކު މުސްތަގުބަލުގައި އިތުރުކަންކަން ކުރުމަށް ތާވަލުކުރަމުން އަންނަކަމަށެވެ.

އެގޮތުން ޑިސޭބަލް ކުދިންގެ ދުވަހުގައި ދުނިޔޭގެ ފެންވަރުގައި ފާހަގަކުރާ ދުވަސް ކަމަށްވާ ޑިސެމްބަރ 3 ވަނަ ދުވަހަށް ހާއްސަކޮށްގެން ގިނަ ކަންކަން ރާވަމުން އަންނަކަން ފާހަގަކުރެެއްވިއެވެ.

ޑަބްލިއުއޭއެމްގެ ޗެއަރޕާރސަން ނަޖީބު ވިދާޅުވީ އެސޯސިއޭޝަންގެ ނަމަކަށް 'ވީލްޗެއަރ' އިން ނަމަވެސް މިއީ ނުކުޅެދުންތެރިކަން ހުންނަ ހުރިހައި ފަރާތްތަކަށް ވެސް އެހީތެރިކަން ފޯރުކޮށްދޭނެ ޖަމިއްޔާއެއް ކަަމަށެވެ. އަދި ވާސޯ މެޑިކަލް ސެންޓަރުން އެ އެސޯސިއޭޝަންގެ ޕާޓްނަރގެ ގޮތުގައި ހަރަކާތްތެރިވުމަކީ މިފަދަ ކަންކަމުގައި ކުރިއަށްދިއުމަށް ލިބޭ އިތުރު ހިތްވަރެއް ކަމަށެވެ.

ވީލްޗެއަރ އެސޯސިއޭޝަން ވުޖޫދުވީ ހާއްސަ އެހީ އަށް ބޭނުންވާ ފަރާތްތަކުގެ ތެރޭގައި ހިމެނޭ ބަލި ހާލަތުގެ ގޮތުން އަމިއްލައަށް ހިނގާ އުޅުމުން މަހްރޫމްވެފައިވާ، ވީލްޗެއަރ ގައި އުޅޭ ފަރާތްތަކަށް އެކިގޮތްގޮތުން އެހީތެރިކަންދީ ހައްގުތައް ހޯދައިދިނުމަށް މަސައްކަތްކުރުމަށްޓަކައެވެ.