ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓުގެ ހިދުމަތް މުޅި ރާއްޖެއަށް ފުޅާކުރުމުގެ މަސައްކަތް، ރައީސް ޑރ. މުޙައްމަދު މުޢިއްޒު އިފްތިތާހުކުރައްވައިފިއެވެ.

ރައްޔިތުންނާ ގާތުން އަވަހަށް ހިދުމަތް ފޯރުކޮށްދިނުމުގެ މަގްސަދުގައި މި ހިދުމަތް އިފްތިތާހުކޮށްދެއްވާފައިވަނީ މިކަމަށްޓަކއި ރައީސުލްޖުމްހޫރިއްޔާގެ އޮފީހުގައި ބޭއްވި ޖަލްސާއެއްގައެވެ.

މި މަސައްކަތުގެ ދަށުން މާލެ ސިޓީގެ ހުރިހާ ސަރަހައްދަކާއި ލ. އަތޮޅާއި ދ. އަތޮޅަށް މި މަސައްކަތް ވަނީ ފުޅާކޮށްފައެވެ. އެގޮތުން، ހުޅުމާލޭ ފުރަތަމަ ފިޔަވައްސާއި، ދެވަނަ ފިޔަވައްސާއި، ވިލިމާލެ، ދ. ކުޑަހުވަދޫ އަދި ލ. ފޮނަދޫން ޕާސްޕޯޓުގެ ހިދުމަތް ފޯރުކޮށްދިނުމުގެ މަސައްކަތް މިއަދު ވަނީ ފައްޓަވާފައެވެ.

ދިވެހިރައްޔިތެއްކަން އަންގައިދޭ ކާޑުގެ ހިދުމަތް މާލެ ސިޓީގެ ހުރިހާ ސަރަހައްދަކާއި ހދ. އަތޮޅަށް ވަނީ ފުޅާކޮށްފައެވެ. އެގޮތުން ހުޅުމާލޭ ފުރަތަމަ ފިޔަވައްސާއި، ދެވަނަ ފިޔަވައްސާއި، ވިލިމާލެ އަދި ކުޅުދުއްފުށީ ސިޓީއިން ދިވެހި ރައްޔިތެއްކަން އަންގައިދޭ ކާޑުގެ ހިދުމަތް ފޯރުކޮށްދިނުމުގެ މަސައްކަތް މިއަދު ވަނީ ފައްޓަވާފައެވެ.

މިއަދުގެ ޖަލްސާގައި ވަނީ، ދިވެހި ރައްޔިތެއްކަން އަންގައިދޭ ކާޑާއި ޕާސްޕޯޓުގެ ހިދުމަތް މުޅި ރާއްޖެއަށް ފުޅާކުރުމުގެ މަގުޗާޓު ވެސް ހިއްސާކުރައްވާފައެވެ. 2025 ވަނަ އަހަރުގެ ނިޔަލަށް ކޮންމެ ސިޓީއަކާއި އަތޮޅެއްގައި ވެސް ކަނޑައެޅޭ ވަކި ސަރަހައްދުތަކުގައި މި ހިދުމަތްތައް ގާއިމުކުރުމަށް ވަނީ ނިންމާފައެވެ. އެގޮތުން:

• 2024 ވަނަ އަހަރުގެ ނޮވެންބަރު މަހުގެ ނިޔަލަށް ދ. ކުޑަހުވަދޫ އާއި ހދ. ކުޅުދުއްފުށީގައި މި ޚިދުމަތް ޤާއިމުކުރުމަށާއި،

• 2025 ވަނަ އަހަރުގެ ފެބްރުއަރީ މަހުގެ ނިޔަލަށް ހދ. މަކުނުދޫގައި ޚިދުމަތް ޤާއިމުކުރުމަށާއި،

• 2025 މާރިޗުމަހުގެ ނިޔަލަށް ގދ. ތިނަދޫ އަދި ގދ. ގައްދޫގައި މި ޚިދުމަތް ޤާއިމުކުރުމަށާއި،

• 2025 ވަނަ އަހަރުގެ އެޕްރިލް މަހުގެ ނިޔަލަށް އައްޑޫ ސިޓީގެ ހިތަދޫ އާއި ހުޅުމީދޫގައްޔާއި ފުވައްމުލައް ސިޓީގައި މި ޚިދުމަތް ޤާއިމުކުރުމަށާއި،

• 2025 ވަނަ އަހަރުގެ މޭމަހުގެ ނިޔަލަށް ހއ. ދިއްދޫ، ހއ. އިހަވަންދޫ، ރ. އުނގޫފާރު އަދި ރ. އަލިފުށީގައި މި ޚިދުމަތް ޤާއިމުކުރުމަށާއި،

• 2025 ވަނަ އަހަރުގެ ޖޫންމަހުގެ ނިޔަލަށް، ށ. މިލަންދޫ އާއި ށ. ފުނަދޫ އާއި ލ. ފޮނަދޫގައި ދިވެހި ރައްޔިތެއްކަން އަންގައިދޭ ކާޑުގެ ޚިދުމަތް ޤާއިމުކުރުމަށާއި،

• 2025 ވަނަ އަހަރުގެ ޖުލައި މަހުގެ ނިޔަލަށް ނ. ވެލިދޫ އާއި ތ. ވޭމަންޑޫގައި މި ޚިދުމަތް ޤާއިމުކުރުމަށާއި،

• 2025 ވަނަ އަހަރުގެ އޯގަސްޓު މަހުގެ ނިޔަލަށް އދ. މަހިބަދޫ އާއި ބ. ދަރަވަންދޫގައި މި ޚިދުމަތް ޤާއިމުކުރުމަށާއި،

• 2025 ވަނަ އަހަރުގެ ސެޕްޓެމްބަރު މަހުގެ ނިޔަލަށް ޅ. ނައިފަރު އަދި ފ. ނިލަންދޫގައި މި ޚިދުމަތް ޤާއިމުކުރުމަށާއި،

• 2025 ވަނަ އަހަރުގެ އޮކްޓޯބަރ މަހުގެ ނިޔަލަށް، މ. މުލި އަދި އއ. ރަސްދޫގައި މި ޚިދުމަތް ޤާއިމުކުރުމަށާއި،

• 2025 ވަނަ އަހަރުގެ ނޮވެމްބަރު މަހުގެ ނިޔަލަށް ވ. ފެލިދޫ، ކ. ތުލުސްދޫ އަދި ކ. ގުރައިދޫގައި މި ޚިދުމަތް ޤާއިމުކުރުމަށް ވަނީ ހަމަޖެހިފައެވެ.

ރައްޔިތުންނަށް ބޭނުންވާ އަސާސީ ހިދުމަތްތައް ރައްޔިތުން ތިބި ހިސާބަކުން ފޯރުކޮށްދެއްވުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވައުދުފުޅެކެވެ.