ޕޮލިސް ކުލަބުން އިންތިޒާމްކޮށްގެން ބޭއްވި 8 އަސައިޑް ވެޓްރަންސް ފުޓްބޯޅަ މުބާރާތުގެ ޗެމްޕިއަންކަން ޕީއެސްއާރުސީން ހޯދައިފިއެވެ.

އެޓީމުން މުބާރާތުގެ ޗެމްޕިއަންކަން ހޯދީ ރޭ ކުޅުނު ފައިނަލް މެޗުގައި ހުޅުމާލެ ޕޮލިސް ޓީމާ ވާދަކޮށް 2-1 އިން މެޗު ކާމިޔާބުކޮށްގެންނެވެ. ފައިނަލް މެޗުގެ މޮޅު ކުޅުންތެރިޔާއަށް ހޮވުނީ ޕީއެސްއާރުސީގެ ޙުސައިން ސިފާޒްއެވެ.

ފައިނަލް މެޗު ޝަރަފްވެރިކޮށްދެއްވާފައިވަނީ ޑެޕިއުޓީ ކޮމިޝަނަރ އޮފް ޕޮލިސް އިސްމާޢީލް ނަވީންއެވެ.

މުބާރާތުގެ އެންމެ ގިނަ ލަނޑުޖެހި ކުޅުންތެރިޔާގެ މަގާމަށް ދެ ކުޅުންތެރިޔަކު ހޮވިފައިވެއެވެ. އެއީ މާލެ ފްރަންޓް ލައިން ޕޮލިސިންގ ގެ އާޔަތުﷲ އިބްރާހީމް އާއި ޕީއެސްއާރުސީގެ ޙުސައިން ސިފާޒްއެވެ. ކޮންމެ ކުޅުންތެރިއެއްވެސް ވަނީ 11 ލަނޑު ޖަހާފައެވެ.

މުބާރާތުގެ ފެއަރ ޕްލޭ ކުޅުންތެރިޔަކަށް މާލެ ފްރަންޓް ލައިން ޕޮލިސިންގގެ އަޙްމަދު އަންވަރު ހޮވުނުއިރު، އެންމެ މޮޅު ކުޅުންތެރިޔަކަށް ހޮވުނީ ޕީއެސްއާރުސީގެ ޙުސައިން ސިފާޒްއެވެ.

މި މުބާރާތުގެ އެންމެ މޮޅު 8 ކުޅުންތެރިންގެ ތެރޭގައި ހިމެނެނީ ޕީއެސްއާރުސީގެ އަޙްމަދު އަޒްމީލް، ޙުސައިން ސިފާޒް، ޢަބްދުﷲ އިބްރާހިމް މަނިކު، މުޙައްމަދު ނާޝިދު، ހުޅުމާލެ ޕޮލިސްގެ ނަސްރުﷲ، އަޙްމަދު ޝާހިދު، މާލެ ފްރަންޓްލައިން ޕޮލިސިންގގެ އާޔަތުﷲ އިބްރާހީމް، އައި ކުލަބުގެ ނައުފަލް މުޙައްމަދުއެވެ.

މުބާރާތުގެ އެންމެ ހިންގުންތެރި މެނޭޖަރަކަށް ހުޅުމާލެ ޕޮލިސްގެ މެނޭޖަރު މުޙައްމަދު އަރުޝަދު ޙަސަން ހޮވުނުއިރު، އެންމެ މޮޅު ކޯޗަކަށް ހޮވުނީ ޕީއެސްއާރުސީގެ ކޯޗު މުޙައްމަދު ހައިދަރުއެވެ. އަދި މުބާރާތުގެ ފެއަރޕްލޭ ޓީމަކީ ޓްރެފިކް ރެކްރިއޭޝަން ކުލަބެވެ.

ޑިސެންބަރު 15 އިން 22 އަށް ގެންދިޔަ މި މުބާރާތުގައި ފުލުހުންގެ މުއައްސަސާގެ ކޮމާންޑް/ޑައިރެކްޓްރޭޓް/ ވިންގް އަދި ޑިޕާޓްމަންޓްތައް ހިމެނޭހެން ޖުމްލަ 7 ޓީމަކުން ބައިވެރިވެފައިވެއެވެ.

މިއީ ފުލުހުންގެ ތެރޭގައި މަސައްކަތްކުރާ މުވައްޒަފުންގެ ތެރެއިން 40 އަހަރުން މަތީ މުވައްޒަފުންނަށް އަމާޒުކޮށްގެން އެމުވައްޒަފުންނަށް ފުޓްބޯޅަ ކުޅުމުގެ ފުރުސަތު ހޯދައިދީ، މަސައްކަތުގެ މާހަލުން ބޭރުން ބައްދަލުވެ، އެކުވެރިކަން އާލާކުރުމާއި ޕޮލިސް ކުލަބުގެ ވެޓަރަންސް ފުޓްބޯޅަ ޓީމު އެކުލަވާލުމުގެ ގޮތުން ބާއްވަމުން އަންނަ މުބާރާތެކެވެ.