ހަޔަރ އެޑިއުކޭޝަން މިނިސްޓްރީން އިންތިޒާމްކޮށްގެން މި މަހުގެ 15 ވަނަ ވީ ހުކުރު ދުވަހު ފެށި ދާލަން އެކްސްޕޯ ގެ ފުރަތަމަ ދުވަހު ވެސް ބޮޑު ތަރުހީބެއް ލިބިފައިވާ ކަމަަށް އެ މިނިސްޓްރީން ހާމަކޮށްފިއެވެ.

އެ މިނިސްޓްރީން ވިދާޅުވީ ރޭ ގެ 10 ޖެހުމާއި ހަމައަށް ކުރިޔަށްދިޔަ ފުރަތަމަ ދުވަހު ވެސް 1000 އަށްވުރެ ގިނަ މީހުން ޒިޔާރަތްކޮށްފައިވާ ކަމަށެވެ.

ދާލަން: ނޭޝަނަލް ސްކިލްސް އެންޑް ކެރިއަރ އެކްސްޕޯ 2024" ގެ ނަމުގައި ކުރިއަށްދާ މި އެކްސްޕޯގައި ރާއްޖޭގެ ޔުނިވަރސިޓީތަކާއި ކޮލެޖް އަދި އިންސްޓިޓިއުޓްތަކާއި ސަރުކާރުގެ ކުންފުނިތަކާއި އިދާރާތަކާއި އަމިއްލަ ކުންފުނިތަކުން ވަނީ ބައިވެރިވެފައެެވެ.

40 އަށްވުރެ ގިނަ ސްޓޯލް ތައްޔާރުކޮށްފައިވާ މި އެކްސްޕޯ އިން ވަޒީފާގެ ފުރުސަތުތަކާއި މަތީތައުލީމުގެ ފުރުސަތުތަކާއި ޒުވާނުންނަށްނަށް ކުރިޔަށްދެވޭނެ އެކި ދާއިރާތަކާއިގުޅޭ މުހިންމު މައުލޫމާތުތައް ފޯރުކޮށްދެއެވެ. އަދި ތަފާތުއެކި ލަކީޑްރޯތަކުން އަގުހުރި އިނާމްތައް ހޯދުމުގެ ފުރުސަތު ވެސް ވަނީ ހުޅުވައިލާފައެވެ.

އެގޮތުން ލަކީ ޑްރޯގެ ދަށުން، ގުރުއަތުން ހޮވޭ 5 ފަރާތަކަށް، މެލޭޝިޔާގެ ޒިއަމެން ޔުނިވަރސިޓީގައި، ބެޗްލަރސް އިން ޖާނަލިޒަމް، ބެޗްލަރސް އިން އަރޓިފިޝަލް އިންޓެލިޖެންސް، ބެޗްލަރސް އިން މެރިން ބަޔޯޓެކްނޮލޮޖީ، ބެޗްލަރސް އިން ޑިޖިޓަލް މީޑިޔާ ޓެކްނޮލޮޖީ އަދި ބެޗްލަރސް އިން ސޮފްޓްވެއަރ އިންޖީނިއަރިންގ ކިޔެވުމުގެ ފުރުސަތު ފާހަގަކޮށްލެވެއެވެ.

މީގެއިތުރުން ވެސް އެކި ސްޓޯލްތަކުން ތަފާތު ލަކީޑްރޯތަކުން ގިނަ އިނާމްތައް ލިބޭއިރު، މި އިވެންޓްގެ ޕާޓްނަރސް އަދި ސްޕޮންސަރުންގެ ފަރާތުން ވެސް ވަނީ އަގުހުރި އިނާމްތައް ހުށަހަޅާފައެވެ.

މި އެކްސްޕޯ މިއަދު ވެސް ހަވީރު 4 ން އިތުއޮއްސި 6 ޖަހަންދެން އަދި ރޭގަނޑު 8 ން 10 ޖަހަންދެް ކުރިއަށްދާނެއެވެ.