ފަރުތައް ހިމާޔަތްކޮށް ރައްކާތެރި ކުރުމުށް ރާއްޖެއިން ކުރަމުންދާ މަސައްކަތްތައް ހިއްސާ ކުރުމަށް ސައިޑް އިވެންޓެއް ބާއްވައިފިއެވެ.

މިއީ ކޮޕް29ގެ ހަވާސާގައި އެންވަޔަރްމެންޓް މިނިސްޓްރީން އިންތިޒާމުކޮށްގެން މޫސުމަށް އަންނަ ބަދަލު ތަކާއި އެކު ދެމެހެއްޓެނިވިގޮތެއްގައި ފަރުތައް ހިމާޔަތްކޮށް ރައްކާތެރި ކުރުމުށް ރާއްޖެއިން ކުރަމުންދާ މަސައްކަތްތައް ހިއްސާ ކުރުމަށް ބޭއްވި އިވެންޓެކެވެ.

މި ސައިޑް އިވެންޓު ފެށުމުގެ ރަސްމިއްޔާތުގައި މިނިސްޓަރ ޡާރިގް އިބްރާހިމް ވަނީ ރާއްޖެއިން ފަރުތައް ހިމާޔަތްކޮށް ރައްކާތެރިކުރުމަށް ކުރަމުންގެންދާ މަސައްކަތްތަކަށް އަލިއަޅުވައިލައްވާފައެވެ.

މިގޮތުން، ސައިންޓިފިކް ދިރާސާތަކާއި މުޖުތަމައުގެ ބައިވެރިވުމާއެކު ރާއްޖޭގެ ފަރުތައް ހިމާޔަތްކޮށް ރައްކާތެރިކުރުމަށް މަސައްކަތްކޮށް ކާމިޔާބީތައް ހޯދާފައިވާކަން ފާހަގަކުރެއްވިއެވެ.

މީގެއިތުރުން ބައިނަލްއަގްވާމީ ފެންވަރުގައި މި ފަދަ މައްސަލަތަކަށް ހައްލު ހޯދުމަށް ރާއްޖެއިން ވަކާލާތު ކުރަމުންދާކަން ފާހަގަކުރެއްވިއެވެ. އަދި ފަރުތަކާއި ކަނޑުތައް ހިޔާމަތްކޮށް ރައްކާތެރިކުރުމަކީ ބައިނަލްއަގްވާމީ ގޮތުން ގުޅިގެން ފިޔަވަޅު އަޅަންޖެހޭ މައްސަލައެއްކަމަށް ވެސް ފާހަގަކުރެއްވިއެވެ.

މި ސައިޑް އިވެންޓްގައި މުރަކަ ފަރުތައް ރައްކާތެރިކުރުމާއި، އިއާދަކުރުމާ ގުޅޭގޮތުން ޕްރެޒެންޓޭޝަންއެއް ވަނީ ހުށަހަޅާފައިއެވެ. އަދި ނިއުއީގެ ފަރާތުން، ފަރުތައް ހިމާތަތްކުރުމުގައި އެ ގައުމުގެ ތަޖުރިބާއާ ކުރަމުންދާ މަސައްކަތްތައް މި ސައިޑް އިވެންޓްގައި ހިއްސާކުރިއެވެ.