ސަރުކާރަށް ޑޮލަރު ވަންނަ އަދަދު އިތުރުކުރުމަށް، ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ސަރުކާރުގައި މަސައްކަތްތަކެއް ކުރެއްވިކަމަށް ކުރީގެ ރައީސް އިބްރާހިމް މުޙައްމަދު ސާލިހު ވިދާޅުވެއްޖެއެވެ.

ރާއްޖެ ޓީވީގެ 'ފަށާއިރު' ޕްރޮގްރާމުގައި ވާހަކަފުޅު ދައްކަވަމުން އެމަނިކުފާނު ވަނީ ޓޫރިޒަމް ދާއިރާގެ ބޭފުޅުންނާއެކު މަޝްވަރާތަކެއް ކުރައްވައި، ފަތުރުވެރިކަމުގެ ދާއިރާއިން ލިބޭ ޑޮލަރުގެ ވަކި އިންސައްތައެއް ބޭންކްތަކަށް މާރުކުރުން މަޝްވަރާކުރެވުނު ކަމަށް ވިދާޅުވެފައެވެ.

"30، 20، 15 ޕަސެންޓް މާރުކުރަން ހުށަހެޅި. އެންމެ ފަހުން ހުށަހެޅީ 10 ޕަސެންޓް މާރުކުރަން. މިއީ ފުރަތަމަ ހުށަހެޅުން. ދެވަނައަށް ރެވެނިއުގެ ގޮތުގައި ލިބޭ ޑޮލަރުގެ 30 ޕަސެންޓް ރާއްޖޭގެ ބޭންކުތަކުގައި 3 މަސް ދުވަހަށް ބަހައްޓަދިނުމަށް ހުށަހެޅި." ރައީސް ސާލިހު ވިދާޅުވިއެވެ.

މީގެއިތުރުން ވެރިކަން ނިމުމަކަށް އައިއިރު، މި ދެ ހުށަހެޅުމާމެދު ވަކި ގޮތެއް ނިންމިފައި ނުވާކަން ފާހަގަކުރައްވައި، އެމަނިކުފާނު ވަނީ ރާއްޖެއަށް ވަންނަ ޑޮލަރު ރާއްޖޭގައި ދައުރުކުރުމަށް މަސައްކަތްތަކެއް ކުރަންޖެހޭކަން ވެސް ފާހަގަކުރައްވާފައެވެ.

އެމަނިކުފާނު އިތުރަށް ވިދާޅުވީ މިހާރު ތައްޔާރުކޮށް ނެރެފައި އޮތް ގަވާއިދަކީ އެންމެ އެކަށޭނެ ރަނގަޅު އުސޫލުކަމަށް ގަބޫލު ނުކުރެވޭ ކަމަށާއި އެކަހަލަ ކަމެއް ނިންމަން ވާނީ ފަތުރުވެރިކަމުގެ ދާއިރާގެ ހުރިހައި ފަރާތްތަކާ މަޝްވަރާކުރުމަށްފަހު ކަމަށް ވެސް ވިދާޅުވިއެވެ.

ހަމަމިއާއެކު އެ ފަރާތްތަކަށް ލިބޭ އާމްދަނީއާ ކުރަންޖެހޭ ހަރަދުތަކަށް ރިއާޔަތްކޮށް، ދިރާސާކުރުމަށްފަހު ޑޮލަރުގެ ވަކި އިޖންސައްތައެއް ބޭންކުތަކަށް މާރުކުރަން ޖެހޭ ގޮތަށް ބަދަލު ގެނައުމަކީ ފަތުރުވެރިކަމުގެ ދާއިރާގެ އެއްވެސް ބޭފުޅަކު ދެކޮޅެއް ހަދާނެ ކަމެއް ކަމަށް ގަބޫލުފުޅުނުކުރައްވާ ކަމަށް ވެސް ވަނީ ވިދާޅުވެފައެވެ.