މީޑިއާ ބިލާއިގުޅިގެން ހުރި ކަންބޮޑުވުންތައް އެޓަރނީ ޖެނެރަލް އަލްއުސްތާޛު އަޙްމަދު އުޝާމް އާ ހިއްސާކޮށްފިއެވެ.

މި ބިލާ ގުޅިގެން މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އާއި މޯލްޑިވްސް މީޑިއާ ކައުންސިލް (އެމްއެމްސީ) ގެ ފަރާތުން ބޭއްވި މި ބައްދަލުކުރެއްވުމުގައި ޔޫތް މިނިސްޓަރ އިބްރާހީމް ވަޙީދާއި، މިނިސްޓަރ އެޓް ދަ ޕްރެޒިޑެންޓްސް އޮފީސް ފޮރ ސްޓްރެޓީޖިކް ކޮމިއުނިކޭޝަން އިބްރާހީމް ޚަލީލް ވެސް ބައިވެރިވެވަޑައިގެންނެވިއެވެ.

މި ބައްދަލުކުރެއްވުމާއި ގުޅޭގޮތުން 'އޮއިވަރު' އަށް މައުލޫމާތު ދެއްވަމުން އެމްއެމްސީގެ މެމްބަރު މޫސާ ރަޝީދު ވިދާޅުވީ ސަރުކާރުގެ ވިސްނުންފުޅަކީ ނޫސްވެރިން ޖޫރިމަނާކުރުން ނޫން ކަމަށާއި މަޖިލީހަށް މިހާރުހުށަހަޅާފައިވާ ބިލަކީ ސަރުކާރުން ހުށަހެޅި ބިލެއް ނޫންކަމަށް އޭޖީ ވިދާޅުވިކަމަށެވެ.

މޫސަ އިތުރަށް ވިދާޅުވީ މަޖިލީހަށް މިހާރުހުށަހަޅާފައިވާ ބިލުގެ ސަބަބުން ސިޔާސީގޮތުން ވެސް ވަރަށްބޮޑު ކަންބޮޑުވުންތަކެއް ހުރިކަން ފާހަގަކޮށް އޭޖީއަށް ދަންނަވާފައިވާނޭކަމަށެވެ.

މި ވާހަކަތަކަށް ރިޔާއަތް ކުރައްވައި، މި ބިލާއި މެދު ގޮތެއް ނިންމުމަށް ރައީސް ޑރ. މުޙައްމަދު މުޢިއްޒުގެ ލަފާފުޅަކަށް އައްސަވާނެ ކަމަށް ވެސް އޭޖީ ވިދާޅުވިކަމަށް މޫސަ ވިދާޅުވިއެވެ.

ރައްޔިތުންގެ މަޖިީހަށް އަމިއްލަ ގޮތުން ވާދަކުރައްވައި، ހޮވިވަޑައިގެން ތުޅާދޫ ދާއިރާގެ މެމްބަރު އަބްދުﷲ ހަންނާން އަބޫބަކުރު ހުށަހަޅުއްވާފައިވާ ބިލަށް ރާއްޖޭގައި މަސައްކަތްކުރާ ގިނަ ނޫސްވެރިން އަންނަނީ ކަންބޮޑުވުން ފާޅުކުރަމުންނެވެ.

'މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަންގެ ގާނޫނު' ގެ ނަމުގައި ހުށަހެޅި މި ބިލުގައި ހިމަނާފައިވަނީ ބްރޯޑްކާސްޓިންގ ކޮމިޝަނާއި އެމްއެމްސީ އެއްކޮށްލައި އައު ކޮމިޝަނެއް އުފެއްދުމަށެވެ.

އެ ބިލުގައިވާ ގޮތުން އައު ކޮމިޝަނުގެ ހަތް މެންބަރުންގެ ތެރެއިން ހަތަރު މެންބަރުން ރައީސުލްޖުމްހޫރިއްޔާ، އައްޔަންކުރައްވާނީ ރައްޔިތުންގެ މަޖިލީހަށް ނަންތައް ފޮނުއްވައިގެނެނެވެ. އަދި ކޮމިޝަންގެ ރައީސާއި ނައިބު ރައީސް ކަނޑައެޅުމުގެ ބާރު ވެސް ލިބިވަޑައިގަންނަވަނީ ރަައީސަށެވެ.

ހަތް މެމްބަރުންގެ އެ ކޮމިޝަންގެ ބާކީ ތިން މެންބަރުން އިންތިހާބު ކުރިނަމަވެސް މުޅި ކޮމިޝަންގެ ފުލް މެޖޯރިޓީ އޮތީ ރައީސްގެ އަތްޕުޅުގައެވެ.