މި ސަރުކާރަކީ އުންމީދު ގެނެސްދޭނެ ސަރުކާރެއް ކަމަށް ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.

ނައިބު މިހެން ވިދާޅުވީ ރައީސް ޑރ. މުޙައްމަދު މުޢިއްޒުގެ ސަރުކާރަށް އެއް އަހަރު ފުރުމާ ގުޅިގެން ޕީ.އެސް.އެމް ނިއުސްއަށް ދެއްވި ބަސްދީގަތުމެއްގައެވެ.

އެމަނިކުފާނު ވިދާޅުވީ ރިޔާސީ ނިންމެވުންތަކަކީ ރައްޔިތުންގެ މުސްތަގްބަލަށްޓަކައި މުހިންމު ނިންމުންތަކެއް ކަމަށެވެ. އަދި ކުރިއަށްއޮތް ތަނުގައި ދިވެހީންގެ ރާއްޖެ މެނިފެސްޓޯ ތަންފީޒުވަމުންދާ މަންޒަރު ފެނިގެންދާނެކަމަށެވެ.

އެގޮތުން ބަޖެޓުގެ ބޮޑު ބައެއް ގެދޮރުވެރިކަމާއި ބޯހިޔާވަހިކަމަށް ހާއްސަކޮށް، ބޯހިޔާވަހިކަމުގެ މަޝްރޫއުތައް ފެށިގެންދާނޭކަމަށް ވިދާޅުވިއެވެ. އަދި ބޭރުގެ ފަރާތްތަކުން ލިބޭ އެހީތަކާއި ގައުމުގެ އުފެއްދުންތެރިކަމުން ލިބޭ އާމްދަނީގެ އެހީގައި ކުރިއަށްއޮތް ހަތަރު އަހަރުގެ އުންމީދުތައް ހާސިލުވެގެންދާނެކަމަށް ވެސް ވިދާޅުވިއެވެ.

"ރައީސުލްޖުމްހޫރިއްޔާ ވެރިކަމަށް ވަޑައިގެންނެވިއިރު، ވާރުތަވެފައިވާ ދަރަންޏާއި، އެ ދަރަނި އަދާކުރާނޭ ރޭވުންތެރި އިންތިޒާމެއް ނެތުމުގެ ސަބަބުން، ސަރުކާރާ ހަވާލުވާތާ ދެތިން މަސް ދުވަހުގެ ތެރޭގައި ދައުލަތް ބަނގުރޫޓުވެދާނޭކަމަށް ބަޔަކު ދުށްނަމަވެސް، މިއަދު ދުނިޔެއިން ރައީސުލްޖުމްހޫރިއްޔާގެ ސިޔާސަތުތައް ވަނީ ބަލައިގެންފަ." ނައިބު ވިދާޅުވިއެވެ.

މީގެއިތުރުން ފައިސާ ޗާފުކުރުން ހުއްޓާލުމާއި، ސަބްސިޑީގެ އުސޫލަށް ބަދަލުގެނައުން ފަދަ ބޮޑެތި، އުނދަގޫ ނިންމުންތަކުގައި ރައްޔިތުން ދެއްވި އެއްބާރުލެއްވުމާއި ދެއްކެވި ކެތްތެރިކަމާއެކު، އެ ގޮންޖެހުންތަކުން އަރައިގަތުމުގައި ކުރިއެރުންތައް ލިބިވަޑައިގެންފައިވާކަން ވެސް ފާހަގަކުރެއްވިއެވެ. ނަތީޖާއެއްގެ ގޮތުން، ބައިނަލްއަގްވާމީ ޖަމުޢިއްޔާތަކާއި، އަވަށްޓެރި ޤައުމުތަކާއި، ޢަރަބި ޤައުމުތަކާއި ހުޅަނގުން ވެސް ރާއްޖޭގެ ތަރައްގީއަށް ކުރާ މަސައްކަތްތަކުގައި އެއްބާރުލުން ދިނުމަށް ތައްޔާރަށް ތިބިކަމަށް އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާގެ ހަރުދަނާ ޚާރިޖީ ސިޔާސަތަށް އަލިއަޅުއްވާލައްވަމުން، ޤައުމީ މަސްލަޙަތު އިސްކުރެއްވުމަށް ފެއްޓެވި މަސައްކަތްތަކުގެ މަންޒަރުތައް ނައްސި ސިފައެއްގައި ދެއްކުމަށް ބަޔަކު ކުރި މަސައްކަތުން ކުރިމަތިވީ ގޮންޖެހުންތަކުން ވެސް އަރައިގަނެވިފައިވާކަން އެމަނިކުފާނު ފާހަގަކުރެއްވިއެވެ.

ޤައުމުގެ އިޖުތިމާޢީ ފޭރާން ރަނގަޅުކުރުމަށް ކުރައްވަމުންގެންދަވާ މަސައްކަތްތަކަށް އަލިއަޅުއްވާލައްވަމުން ރައީސުލްޖުމްހޫރިއްޔާގެ ނައިބު ވިދާޅުވީ، ސަރުކާރުން މަސައްކަތްކުރަމުންދަނީ ޒުވާން ޖީލު، ހަރުދަނާގޮތުގައި ބިނާކުރުމަށް ކަމަށެވެ. މުޖުތަމަޢުގެ ކަންކަން ހަމައިން ނެއްޓިދާނޭ ފަދަ ސިޔާސީ ނިންމުންތަކުން އެއްކިބާވެވަޑައިގަންނަވާ، ކުށާއި މާރާމާރީ މަދުކުރެވި، އާންމު މަސްލަހަތު ހުރި ކަންކަމުގައި ލުއިތައް ލިބެމުންދާ މަންޒަރު މިއަދު ފެންނަމުންދާކަމުގައި އެމަނިކުފާނު ވިދާޅުވިއެވެ.

ސަރުކާރުގެ އަމާޒަކީ، ކޮންމެ ސަރުކާރެއް ބަދަލުވެގެންދާއިރު ވަކިވެގެންދާ ސަރުކާރުގެ މަޝްރޫޢުތައް ހުއްޓާލުމުގެ ޘަޤާފަތް ރާއްޖެއިން ނައްތާލައި، ރައްޔިތުންގެ މަސްލަޙަތު އިސްކުރުންކަން ފާހަގަކުރައްވަމުން، ޤައުމީ ތަރައްޤީގެ 20 އަހަރު ދުވަހުގެ ޕްލޭންގެ އަމާޒަކީވެސް ރައްޔިތުންނަށް މަންފާ ލިބޭ ފަދަ މަސައްކަތްތަކަށް ޤާނޫނީ ބާރު ލިބި، ޢާންމު މަސްލަޙަތު ކަށަވަރުކުރުންކަން އެމަނިކުފާނު ފާހަގަކުރެއްވިއެވެ.