މީޑިއާ ކޮމިޝަންގެ ބިލު ރައްޔިތުންގެ މަޖިލީހަށް ބަލައިނުގަންނާނެ ކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރަށް އެއް އަހަރު ފުރުމުގެ މުނާސަބަތުގައި ބޭއްވި ރަސްމިއްޔާތަށްފަހު، ކާރުކޮޅަށް އަރާވަޑައިގަންނަވަނިކޮށް 'ދައުރު' ނޫހުގެ ސީނިއަރ ޖާނަލިސްޓް މުޒައްޔިން ކުރި ސުވާލަށް ޖަވާބު ދެއްވަމުންނެެވެ.

މަޖިލީހުގެ މެޖޯރިޓީ ޕީއެންސީ އަށް އޮތްއިރު އެ ބިލު މަޖިލީހުން ބޭރު ކުރާނެތޯ؟ މުޒައްޔިން ސުވާލުކުރަން ފެށުމުން އެ ސުވާލުކޮށް ނުނިމެނީސް ރައީސް ވިދާޅުވީ އެ ބިލު ބޭރު ކުރާނެ ކަމަށާއި ބަލައި ނުގަންނާނެ ކަމަށެވެ.

އެމްޖޭއޭގެ އެކްސްކޯ މެންބަރު އަދި 'ދައުރު'ގެ ސީނިއާ ނޫސްވެރިޔާ މުޒައްޔިން ނާޒިމް ރައީސް މުއިއްޒުއާ މިރޭ ސުވާލުކުރުމުން ވިދާޅުވީ، އަމިއްލަ މެންބަރަކު މަޖިލީހަށް މިހާރު ވައްދާފައިވާ "މީޑިއާ ކޮންޓްރޯލް ބިލް" ބަލައިގަންނަން ޕީއެންސީގެ ޕާލިމަންޓްރީ ގްރޫޕުން ވޯޓް ނުދޭނެ ކަމަށާއި އެ… pic.twitter.com/45XfFyZDAf

— Maldives Journalists Association (@mjamaldives) November 17, 2024

ސަރުކާރަށް 365 ދުވަސް ދުވަސްފުރުން ފާހަގަކުރުމަށް ބޭއްވި ރަސްމިއްޔާތުގައި ވެސް އެމަނިކުފާނު މިފަދައިން ވިދާޅުވެފައިވަނީ މީޑިއާ ކޮންޓްރޯލް ކުރައްވަން ނޫޅުއްވާ ކަމަށެވެ. އަދި ބޭނުންވަނީ މިހާރަށްވުރެވެސް ބޮޑަށް މީޑިއާ މިނިވަންވުން ކަމަށެވެ. 

ރައްޔިތުންގެ މަޖިީހަށް އަމިއްލަ ގޮތުން ވާދަކުރައްވައި، ހޮވިވަޑައިގެން ތުޅާދޫ ދާއިރާގެ މެމްބަރު އަބްދުﷲ ހަންނާން އަބޫބަކުރު ހުށަހަޅުއްވާފައިވާ ބިލަށް ރާއްޖޭގައި މަސައްކަތްކުރާ ގިނަ ނޫސްވެރިން އަންނަނީ ކަންބޮޑުވުން ފާޅުކުރަމުންނެވެ.

'މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަންގެ ގާނޫނު' ގެ ނަމުގައި ހުށަހެޅި މި ބިލުގައި ހިމަނާފައިވަނީ ބްރޯޑްކާސްޓިންގ ކޮމިޝަނާއި އެމްއެމްސީ އެއްކޮށްލައި އައު ކޮމިޝަނެއް އުފެއްދުމަށެވެ.

އެ ބިލުގައިވާ ގޮތުން އައު ކޮމިޝަނުގެ ހަތް މެންބަރުންގެ ތެރެއިން ހަތަރު މެންބަރުން ރައީސުލްޖުމްހޫރިއްޔާ، އައްޔަންކުރައްވާނީ ރައްޔިތުންގެ މަޖިލީހަށް ނަންތައް ފޮނުއްވައިގެނެނެވެ. އަދި ކޮމިޝަންގެ ރައީސާއި ނައިބު ރައީސް ކަނޑައެޅުމުގެ ބާރު ވެސް ލިބިވަޑައިގަންނަވަނީ ރަައީސަށެވެ.

ހަތް މެމްބަރުންގެ އެ ކޮމިޝަންގެ ބާކީ ތިން މެންބަރުން އިންތިހާބު ކުރިނަމަވެސް މުޅި ކޮމިޝަންގެ ފުލް މެޖޯރިޓީ އޮތީ ރައީސްގެ އަތްޕުޅުގައެވެ.