މި ވަގުތަކީ ދިވެހި ގައުމިއްޔަތަށް އައު ދިރުމެއް ލިބޭ ވަގުތެއް ކަމަށް ރައީސުލްޖުމްހޫރިއްޔާގެ އަނބިކަނބަލުން، މެޑަމް ސާޖިދާ މުޙައްމަދު ވިދާޅުވެއްޖެއެވެ.

އެކަމަނާ މިހެން ވިދާޅުވީ ދިވެހި ޤައުމިއްޔަތުގެ އިސްވަރުގެ އޮފީސް ހުޅުވުމުގެ ރަސްމިއްޔާތު ޝަރަފުވެރިކޮށްދެއްވައި، ވާހަކަފުޅުދައްކަވަމުންނެވެ.

މެޑަމް ސާޖިދާ ވިދާޅުވީ ދިވެހި ޤައުމިއްޔަތަކީ ދިވެހީންގެ މާތްވެގެންވާ އިސްލާމްދީނާއި، ދިވެހީންގެ މާދަރީ އަމިއްލަ ދިވެހި ބަހާއި، ސަގާފަތް ކަމަށެވެ. އަދި ތަރިކައާއި އާދަކާދައާއި ސިލްސިލާކޮށް ގުޅެމުން ވާރުތަވަމުން އަންނަ ދިވެހީންގެ ހަނދާންތަކާއި ތަޖުރިބާތައް ކަމުގައެވެ.

ދިވެހި ގައުމިއްޔަތުގެ އިސްވަރުގެ މަސައްކަތް ރަސްމީކޮށް ފެށުން ވެގެންދާނީ ދިވެހި ގައުމިއްޔަތަށް ހޭލުންތެރި އައު ޒަމާނެއް އައުންކަމުގައި ވެސް ވިދާޅުވިއެވެ. އަދި މި މަސައްކަތް ރަސްމީކޮށް ފެށުމަކީ، ދިވެހި ގައުމިއްޔަތަށް ހޭލުންތެރިކުރުވުމުގެ އައު ހަރަކާތްތެރިކަމެއްގެ ފެށުން ކަމަށް ވެސް ވިދާޅުވިއެވެ.

" އެކަމުގެ ސަބަބުން ޤައުމާމެދު ހެޔޮ ވިސްނުންތަކެއް އުފެދި، މާތް ﷲގެ އިރާދަފުޅާއެކު، އުފާވެރި މާދަމާއަކަށް ޖާގަ ތަނަވަސްވާނެ. ދިވެހި ޤައުމިއްޔަތު ދިރިގެން އައުމަކީ ދިވެހީން މާތްވެގެންވާ އިސްލާމްދީނުގެ އަޚްލާޤީ ގަހަނާއިން ޒީނަތްތެރިކޮށް، ދިވެހީންނަށް ދިވެހީންގެ އަމިއްލަ ބަހާއި ސަގާފަތާއި އާދަކާދައިގެ އަގުތައް މޭރުންވެ، ދިވެހީންނަކީ ތަހުޒީބު ހަރުދަނާ ވިސްނުންތެރި ބަޔަކު ކަމުގައިވުން." އެކަމަނާ ވިދާޅު ވިއެވެ.

މީގެއިތުރުން ދިވެހީންގެ ފަސްގަނޑާއި ދިވެހީންނާއި ދިވެހި ދައުލަތުގެ ދެމި އޮތުން ކަށަވަރުކުރުމުގެ ޢިލްމީ ފިކުރު ދިވެހީންގެ ވިސްނުމުގައި ހަރުލަމުން، އަށަގަންނަމުން އެ ކަމަށް އަހުލުވެރިވަމުން ދިޔުންކަން ފާހަގަކުރައްވައި، ދިވެހި ގައުމިއްޔަތުގެ ޢިލްމަކީ ދިވެހީންގެ ދެމި ތިބުމާ ގުޅިފައިވާ ޢިލްމެއްގެ ގޮތުގައި ވަނީ ސިފަކުރައްވާފައެވެ.