އެއަރޕޯޓުން ޑޮލަރު މާރުކުރެވޭ އަދަދު ބަދަލުކުރަން ނިންމައި، ރައީސް ޑރ. މުޙައްމަދު މުޢިއްޒު އެކަން އިއުލާން ކުރައްވައިފިއެވެ.

ސަރުކާރަށް 52 ހަފްތާ ފުރުމުގެ މުނާސަބަތުގައި ވޭއްވި ރަސްމިއްޔާތުގައި ވާހަކަފުޅު ދައްކަވަމުން އެމަނިކުފާނު ވަނީ ބޭރު ފައިސާ މާރުކުރުމުގެ ގަވައިދަށް ޢަމަލުކުރަން ފެށުމުން އަންނަ ޖެނުއަރީ މަހުން ފެށީގެން 14 މަސް ދުވަހުގެ ތެރޭގައި މި ބަދަލު ގެނެވޭނެ ކަމަށެވެ.

އެގޮތުން 2026 ވަނަ އަހަރުގައި ދިވެހިން ރާއްޖެއިން ބޭރަށް ދިއުމަށް ޑޮލަރު މާރު ކުރުމުގެ ލިމިޓް 1000 ޑޮލަރަށް އިތުރުވާނެ ކަމަށް ވިދާޅުވިއެވެ. މިހާރުގެ ލިމިޓަކީ 500 ޑޮލަރެވެ.

ޑޮލަރު ލިބުމުގައި ހުރި ދަތިކަމުގެ ވާހަކައަށް އަލި އަލުއްވާލައްވަމުން ރައީސް ވިދާޅުވީ ސަރުކާރު ކުންފުނިތަކަށް ވެސް ޑޮލަރު ބޭނުންވެއްޖެ ހާލަތެއްގައި ޖެހެނީ އަގު ބޮޑުކޮށް ވަގު ބާޒާރުން ޑޮލަރު ގަންނަން ކަމަށެވެ. އަދި ބޭރު ފައިސާ މާރުކުރުމުގެ ގަވައިދަށް ގެނައި އިސްލާހާއެކު މިކަމަށް ވެސް ހައްލެއް ލިބިގެން ދާނެ ކަމަށް ވިދާޅުވިއެވެ.

މީގެއިތުރުން ސަރުކާރު ކުންފުނިތަކަށް ބޭންކް ރޭޓުގައި ޑޮލަރު ލިބޭނެ އިންތިޒާމް އަންނަ އަހަރުގެ މެދު ތެރޭގައި ހަމަޖެހޭނެކަމަށް ވެސް ވިދާޅުވިއެވެ.

ބޭރު ފައިސާއާ ބެހޭ ގަވައިދަށް ގެނައި އސްލާހަށް މިދިޔަ މަހުގެ އެއްވަނަ ދުވަހު ޢަމަލު ކުރަން ފަށާފައިވާ އިރު، ރިސޯޓްތަކުން ބޭންކްތަކަށް ބޭރު ފައިސާ މާރު ކުރަން ޖެހުމާ މެދު ބައެއް ވިޔަފާރިވެރިން އަންނަނީ ކަންބޮޑުވުން ފާޅު ކުރަމުންނެވެ.

އެގޮތުން ރިސޯޓަށް ޒިޔާރަތްކުރާ ކޮންމެ ފަތުރުވެރިއަކަށް 500 ޑޮލަރު ބޭންކްތަކަށް މާރުކުރަން އެ އުސޫލުގައި ލާޒިމްކޮށްފައި އޮތް އޮތުމަށް ގިނަ ބަޔަކު ދެބަސްވެއެވެ.

މި ޖަލްސާގައި ރައީސް މުއިއްޒު ވަނީ އެ ގޮތަށް ކަންބޮޑުވުން ފާޅު ކުރި ކަމުގައި ވީނަމަވެސް އެ އުސޫލު ބަދަލު ނުކުރާނެ ކަމަށެވެ. އަދި އެ އުސޫލުގައި އޮތް ގޮތަށް ޑޮލަރު މާރު ކުރަން ޖެހޭނެ ކަމަށް ވެސް ވިދާޅުވިއެވެ.