ސަރުކާރުން އަންނަ އަހަރަށް ލަފާކޮށް ހުށަހަޅުއްވާފައިވާ ބަޖެޓުގެ ދަށުން ރާއްޖޭގެ ހުރިހާ ރަށެއްގައި ވެސް މަޝްރޫޢުތައް ކުރިއަށްގެންދާނެ ކަމަށް ފިނޭންސް މިނިސްޓަރ މޫސާ ޒަމީރު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ރައްޔިތުންގެ މަޖިލީހުގައި ކުރިއަށްދާ ބަޖެޓު ބަހުސްގައި ބައިވެރިވެވަޑައިގެން ވާހަކަ ދައްކަވަމުންނެވެ.

މިނިސްޓަރު ވިދާޅުވީ މިފަހަރުގެ ޕްރޮޖެކްޓުތައް ޕްރައޯރަޓައިޒްކޮށް ވިސްނާާފައި އޮތީ ޕްރޮޖެކްޓުގެ ޕްރޮޕަރައިޓަރީ ފަންޑު އެލޮކޭޓްކޮށް ހަދާފައި ރައީސްގެ ޕްރައޯރަޓައިޒް ލިސްޓުގެ ތެރެއިން ޕްރޮޖެކްޓުތައް ކުރިއަށްގެންދަން ކަމަށެވެ.

"އަޅުގަނޑު ދޭން އޮތް ޔަގީންކަމަކީ މިހާރު އަޅުގަނޑުމެން ގެންގުޅޭ ލިސްޓުގައިވެސް އެއްވެސް ރަށެއް އުނިވެފައި ނޯންނާނެ." މިނިސްޓަރު ވިދާޅުވިއެވެ.

މީގެއިތުރުން ސަރުކާރުން މީގެކުރިން ނިންމަވާފައިވާގޮތަށް ރާއްޖޭގެ ހުރިހައި ރަށެއްގައި ވެސް އޭޓީއެމް ބަހައްޓާނެކަމަށާއި ސަރުކާރު ހިއްސާވާ ކުންފުނިތައް ރިފޯމްކުރުމުގެ ދަށުން އެ ކުންފުނިތަކަކީ ޖަވާބުދާރީވާންޖެހޭ ގޮތަށް ހިންގާ ތަންތަނަށް ހަދާނެ ކަމަށް ވެސް ވިދާޅުވިއެވެ.

ހަމަމިއާއެކު އެއް މަސައްކަތެއް ކުރާ ކުންފުނިތައް އެއްކޮށްލައި، ރަނގަޅު ނަތީޖާ ނުކުންނަންޏާ އެ ބަދަލު ވެސް ގެންނަވާނެކަމަށް ވިދާޅުވިއެވެ.