ސަރަހައްދީ ތަރައްގީގެ އައު ބާބެއް އިރާދަކުރެއްވިއްޔާ ފެންނާނެ ކަމުގައި ރައީސް ޑރ. މުޙައްމަދު މުޢިއްޒު ވިދާލުވެއްޖެއެވެ.

"ހަފުތާ 52- ރައްޔިތުންނާއެކު ކުރިއަށް" ނަމުގައި ހާއްސަ ރަސްމިއްޔާތުގައި އެމަނިކުފާނު ވަނީ ރާއްޖޭގެ އުތުރާއި ދެކުނުގައި މަތީ ފަންތީގެ ހިދުމަތްތަކާއެކު އަރބަން ރީޖަން ތައާރަފުކޮށް، މިހާރު އިއުލާނުކޮށްފައިވާ ފަދައިން ރާއްޖޭގެ އެކި ކަންކޮޅުތަކުގައި 7 އާރބަން ސެންޓަރު ތަރައްގީކުރައްވާނެ ކަަމަށް ވިދާޅުވެފައެވެ.

ރައީސް ވިދާޅުވީ އެމަނިކުފާނު އެދިވަޑައިގަންނަވަނީ އެންމެންނަށް ވެސް އެއް ފެންވަރެއްގެ ރަނގަޅު ހިދުމަތްތައް ލިބުންކަމަށާއި އެހެންނަމަވެސް މި ކަންކަމުގައި ރައްޔިތުންގެ ބަސް ހޯއްދަވާނޭކަމުގެ ޔަގީންކަން ދެއްވާ ކަމަށެވެ.

މީގެއިތުރުން ސަރުކާރުގެ އަމާޒަކީ އާބާދީ އެއްފަސްކުރެވެންދެން ވެސް، ހުރިހާ ހިދުމަތްތަކެއް ހުރިހާ ރަށަކުން ލިބޭނޭ ގޮތް ފަހިކޮށްދެއްވުން ކަމަށް ވިދާޅުވިއެވެ.

އެގޮތުން ކުރީން ވެސް ނިންމަވާފައިފަދައިން އޭޓީއެމް ނެތް ހުރިހާ ރަށްތަކުގައި އޭޓީއެމް ހިދުމަތް ފަށައި، ކޮންމެ ރަށަކުން އެސް.ޓީ.އޯ ރޭޓުގައި ތެޔޮ ލިބޭނޭ އިންތިޒާމު ފަހިކޮށްދެއްވާނޭކަމުގައި ވިދާޅުވިއެވެ.

މީގެއިތުރުން ހުރިހާ އަތޮޅަކަށް އާރް.ޓީ.އެލްގެ ހިދުމަތް ފުޅާކޮށް، އެހީތެރިކަން ބޭނުންވާ ފަރާތްތަކަށް ސަބްސިޑީއާއި އާސަންދަ އަދި އިޖުތިމާއީ ރައްކާތެރިކަން، ސަލާންޖަހަން ނުޖެހޭ މިންވަރަށް ފުރިހަމަކުރުމަކީ ސަރުކާރުގެ އަމާޒެއްކަން ވެސް ވަނީ ވިދާޅުވެފައެވެ.