ނުކުޅެދުންތެރިކަން ހުންނަފަރާތްތަކަށް ދޭން ޖެހޭ ސަލާމަތާއި ރައްކާތެރިކަން ކަށަވަރު ކޮށްދިނުމަށް ވީލްޗެއަރ އެސޯސިއޭޝަން އޮފް މޯލްޑިވްސް އިން ގޮވާލައިފިއެވެ.

އެ އެސޯސިއޭޝަނުން މިފަދައިން ގޮވާލީ ހިނގުމުގައި ނުކުޅެދުންތެރިކަން ހުންނަ ކުއްޖެއް ކަމުގައިވާ އަލީފްގެ ވީލްޗެއަރ ގެއްލުމާއިގުޅިގެންނެެވެ.

އެ އެސޯސިއޭޝަންގެ ޗެއަރޕާރސަން އަޙްމަދު ނަޖީބު ވިދާޅުވީ ބައިނަލްއަގްވާމީ ނުކުޅެދުންތެރިކަން ހުންނަފަރާތްތަކުގެ ދުވަސް ފާހަގަކޮށް ނިމިގެން ދިޔަތާ 24 ގަޑިއިރު ނުވަނީސް ނުކުޅެދުންތެރިކަން ހުރި ކުއްޖެއް ކަމުގައިވާ މ. ހިޔާވަހިގެއާގެ އަލްއަޚް އަހްމަދު އަލީފްގެ ވީލްޗެއަރ ގެއްލިފައިވާ ކަމުގެ ޚަބަރު ލިބިގެން ދިއުމަކީ ވީލްޗެއަރ އެސޯސިއޭޝަނުން ކަންބޮޑުވާކަމެއް ކަމުގައެވެ.

"ނުކުޅެދުން ތެރިކަން ކަންހުންނަފަރާތްތަކަށް ހިމާޔަތާއި، ރަށްކާތެރިކަން ކަށަރުކޮށްދޭން ޖެހިފައިވާކަން އެނގިތިބެ، ޖިސްމާނީ ނުކުޅެދުންތެރިކަން ހުރި ފަރާތެއްގެ ވީލްޗެއަރ ގެއްލިގެން (ވަގަށްގެންދިއުން) އެންމެ ހަރުކަށި އިބާރާތުން ކުއްވެރިކުރަން." ނަޖީބު ވިދާޅުވިއެވެ.

މީގެއިތުރުން ނުކުޅެދުންތެރިކަން ހުންނަފަރާތްތަކަށް ދޭން ޖެހޭ ސަލާމަތާއި، ރައްކާތެރިކަން ކަށަވަރު ކޮށްދިނުމަން ކަމާބެހޭ އެންމެހައި އިދާރާތަކަށް އޭނާ ވަނީ ގޮވާލައްވާފައެވެ.

އަލީފްގެ ވީލްޗެއަރ ގެއްލުނީ ޑިސެމްބަރ 4 ވަނަ ދުވަހުގެ މެންދުރުފަހު 2:45 ހާއިރު، އެމީހުން ދިރިއުޅޭ ގޭގެ ސިޑި ކައިރީގައި ހުއްޓައެވެ. އަލީފުމެންގެ ގެ ހުންނަނީ މާފަންނު އެލްސިއޯން ބޭކަރީ ކައިރީގައެވެ.

އަލީފް އަކީ ނުކުޅެދުންތެރިކަމެއް ހުރިނަމަވެސް ހިތްވަރުގަދަ، އަދި އެންމެން ވެސް ދަންނަކުއްޖެކެެވެ. އަދި އަލީފު އަންނަނީ ތަފާތުއެކި ހަރަކާތްތަކުގައި ވެސް ބައިވެރިވެ، އެހެންކުދިންނަށް ނަމޫނާ ވެސް ދައްކަމުންނެވެ.

އަލީފުގެ އާއިލާ އިން ވަނީ އެ ގޮނޑި ފެނިއްޖެނަމަ، އެކަން ވީހާ ވެސް އަވަހަކަށް އަންގައި ދިނުމަށް އެދިފައެވެ.