މިނިވަން ގައުމެއްގެ ގޮތުގައި މިއަދު ދެމިއޮތީ ގައުމުގެ މިނިވަންކަމަށްޓަކައި ޖިހާދުކުރެއްވި އަބްތާލުންގެ ސަބަބުން ކަމުގައި ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.

ހުރަވީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން އެމަނިކުފާނު ވަނީ ޒަމާން ބަދަލުވެ ހަނގުރާމަ ކުރާ ގޮތްތައް ވެސް މިއަދު ބަދަލުވެފައިވާކަން ފާހަގަކުރައްވާފައެވެ.

އެގޮތުން ކަނޑިއާއި ބަޑިއާއި ލޮންސި ބޭނުންކޮށްގެން ހަނގުރާ ކުރުމުގެ އިތުރަށް މިއަދު ފިކުރީ ނުވަތަ ހައިބްރިޑް ހަނގުރާމައެއް ކުރަމުންދާ ކަމަށާއި މިފަދަ އުކުޅުތަކުން ގައުމުތައް ސުންނާފަތި ކުރަމުންދާއިރު، އިންޓަރނެޓުގެ ޒަރީއްޔާއިން ވެސް ރުޅިވެރިކަމާއި ނަފްރަތު އުފެއްދުމުގެ މަސައްކަތް ކުރެވޭކަން ފާހަގަކުރެއްވިއެވެ.

މީގެއިތުރުން މިއީ ސިޔާސީ ހަލަބޮލިކަން އިތުރުކޮށް ސަގާފީ ނުފޫޒުގެ ތެރެއިން ގައުމިއްޔާތާއި، އިގްތިސާދީ ތަސައްވުރުތަކާއި ތޮޅުމަށް ކުރެވޭ މަސައްކަތެއްގެ ގޮތުގައި ވެސް ވަނީ ސިފަކުރައްވާފައެވެ. އެހެންކަމުން މިއަދު އެންމެ ބޮޑު ސަމާލުކަމެއް ދޭން ޖެހެނީ މިފަދަ ވިސްނުންތަކުން ދިފާއުވުމަށް ކަމުގައި އެމަނިކުފާނު ވިދާޅުވިއެވެ.

" މިއަދު ހައިބްރިޑް ހަނގުރާމައިން ދަފާރާވުމަށް ކުރަންޖެހިފައިވާ ވަރަށް ގިނަ ކަންކަން އެބަހުރި. ސައިބަރ ރައްކާތެރިކުރުމުގެ ތަމްރީނުުތައް ދީ ނުރައްކާތައް ދެނެގަތުމުގެ އުކުޅުތައް ދަސްކޮށްދޭން އެބަޖެހޭ." ނައިބު ވިދާޅުވިއެވެ.

މި ޖަލްސާގައި ނައިބު އިތުރަށް ވިދާޅުވީ އެކިގޮތްގޮތުން ފެތުރޭ މައުލޫމާތާއި ދެކޮޅަށް މަސައްކަތް ކުރަން މިއަދު މަޖުބޫރުވެފައިވާ ކަމަށެވެ.

ރާއްޖޭގެ މުޖްތަމައުގެ ދުޅަހެޔޮކަމަށް ރައީސުލްޖުމްހޫރިއްޔާ ގިނަ މަސައްކަތްތަކެއް ކުރައްވަމުން ގެންދަވާކަން ފާހަގަކުރައްވައި، އެމަނިކުފާނު ވަނީ ގައުމުގެ މަސްހަލަތައްޓަކައި އެކި ފަރާތްތަކާއެކު ވަރަށް ގާތް ގުޅުމެއް ރައީސުލްޖުމްހޫރިއްޔާ ބާއްވަމުން އަންނަކަމަށް ފާހަގަކުރައްވާފައެވެ. އަދި ގައުމުގެ އެންމެ މަތީ މަސްލަހަތު ހިމާޔަތްކޮށް ސުލްހަވެރި ގައުމެއްގެ ގޮތުގައި ބޭއްވުމަށް އެމަނިކުފާނުގެ އިރުޝާދުގެ ދަށުން މަސައްކަތް ކުރައްވަންޖެހޭ ކަމަށްވެސް ވިދާޅުވިއެވެ.