ސިޔާސީ މަގާމުތަކަށް އައްޔަން ކޮށްފައި ތިބި މީހުންގެ ތެރެއިން، ވަޒީފާއިން މިހާރުވަކިކޮށްފައިވާ ފަރާތްތަކުގެ މައުލޫމާތު ހާމަ ކުރަން ސަރުކާރުން ބޭނުންފުޅު ނުވާކަން ހާމަކުރައްވައިފިއެވެ.

ސަރުކާރުން އަޅަމުންދާ ހަރަދު ކުޑަކުރުމުގެ ފިޔަވަޅުގެ ދަށުން ސިޔާސީ މަގާމުތަކުގައި ތިބި 228 މުވައްޒަފުން ވަކިކުރަން ނިންމަވާފައިވާކަން ރައީސް ޑރ. މުހައްމަދު މުއިއްޒު ވަނީ ވިދާޅުވެފައެވެ. މިފަދައިން ވިދާޅުވީ އޮކްޓޯބަރ މަހުގެ 15 ވަނަ ދުވަހު 'އެކްސް' ގައި ހިއްސާ ކުރެއްވި ޕޯސްޓެއްގައެވެ.

އޭގެފަހުން ރައީސް އޮފީހުގެ އިސްތަރުޖަމާނު ހީނާ ވަލީދު ވަނީ ރައީސް އިއުލާންކުރައްވާފައިވާ އަދަދަށް ސިޔާސީ މަގާމުތަކުން މީހުން ވަކިކޮށްފައިވާކަމުގެ ޔަގީންކަން ދެއްވާފައެވެ.

ވަޒީފާ އިން ވަކިކުރި މަގާމުތަކުގެ ތެރޭގައި 7 ސްޓޭޓް މިނިސްޓަރަކާއި 43 ޑެޕިއުޓީ މިނިސްޓަރަކާއި 109 ސީނިއާ ޕޮލިޓިކަލް ޑިރެކްޓަރުންނާއި 69 ޕޮލިޓިކަލް ޑިރެކްޓަރުން ހިމެނެއެވެ.

އެހެންނަމަވެސް އޭރުވެސް އޭގެ މާ ބޮޑު ތަފްސީލެއް ހާމަކުރައްވާފައި ނުވާތީ އަމިއްލަ ފަރާތަކުން ވަނީ މައުލޫމާތު ހޯދައި ލިބިގަތުމުގެ ގާނޫނުގެ ދަށުން ރައިޓް ޓު އިންފޮމޭޝަން (އާރްޓީއައި) އެއް ހުށަހަޅާފައެވެ. އޭނާ އެދިފައި ވަނީ އެ މީހުންގެ ނަމާއި، މުސާރައާއި މަގާމު އަދި އައްޔަން ކޮށްފައި ތިބި އިދާރާތަކުގެ މައުލޫމާތު ދިނުމަށެވެ.

އެ ސިޓީގެ ޖަވާބުގައި ރައީސް އޮފީހުން ވިދާޅުވޗެފައިވަނީ ސިޔާސީ މުވައްޒަފުންގެ ނަމަކީ ޒާތީ މައުލޫމާތު ކަމަށާއި އެ މުވައްޒަފުން ވަޒީފާ އަދާކުރި މިނިސްޓްރީތައް ހާމަކޮށްފިނަމަ، އެ މީހުންގެ ޒާތީ މައުލޫމާތުތަކެއް ހާމަކުރެވިދާނެ ކަމަށެވެ.

އެހެންކަމުން އެ މައުލޫމާތު ހިއްސާ ކުރެވެން ނެތް ކަމަށް ރައީސް އޮފީހުން ވަނީ ވިދާޅުވެފައެވެ.