ދުންފަތުން ދުރުވުމަށް ބޭނުންވާ މީހުންގެ ފަރުވާގެ ކަންކަން އާސަންދައިން ލިބޭނެގޮތް ހަމަޖައްސާފައިވާ ކަމުގައި ހެލްތު މިނިސްޓަރ ޢަބްދުﷲ ނާޒިމް އިބްރާހިމް ވިދާޅުވެއްޖެއެވެ.

ހެލްތު މިނިސްޓްރީން ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ ސެޒޭޝަންގެ ހިދުމަތް ފަސޭހައިން ލިބޭނެ ގޮތް ހެދުމަށް ކުއިކް ލައިނެއް ގާއިމުކޮށް، މިމަހުގެ 8 ވަނަ ދުވަހުން ފެށިގެން ކުއިކް ލައިންގެ ހިދުމަތް ލިބެން ފަށާނެކަމަށެވެ.

މިނިސްޓަރު ވިދާޅުވީ ދުންފަތާ ދުރުވާން ބޭނުންވާ މީހުންނަށް ބޭނުންވާ ނިކޮޓިން ޕެޗް އަދި ގަމް އާއި އެހެނިހެން ފަރުވާތައް ވެސް އާސަންދައިން ލިބޭނެ ގޮތް ސަރުކާރުން މިހާރު ވަނީ ހަމަޖައްސާފައި ކަމަށެވެ.

މީގެއިތުރުން މި ހިދުމަތް މުޅި ރާއްޖޭގައި ފެށުމަށް ބަޖެޓް ހަމަޖައްސާފައިވާ ކަމަށާއި އެކަމަށް ބޭނުންވާ މީހުން ތަމްރީން ކުރުމުގެ މަސައްކަތް ދެތިން މަހުގެ ތެރޭގައި ނިންމާލުމަކީ އަމާޒެއްކަމަށް ވެސް ވިދާޅުވިއެވެ.

1676 ކްއިކް ލައިން ނަމްބަރުން 24 ގަޑިއިރު ހިދުމަތް ލިބޭނެ ކަމަށާއި މި ކުއިކް ލައިންގެ ޒަރިއްޔާ އިން ގުޅައިގެން ފޯނުން ދެވޭ ހިދުމަތްތަކާއި ނިކޮޓިން އެޑިކްޝަނުން ދުރުވުމާ ގުޅޭ މައުލޫމާތުތައް ވެސް ހިއްސާކުރާނެކަމަށް އެޗްޕީއޭ އިން ވަނީ ވިދާޅުވެފައެވެ.

މީގެއިތުރުން ސެޒޭޝަންގެ ހިދުމަތް ދިނުމަށް ބޭނުންވާ ފަންނީ މުވައްޒަފުން ވެސް މިހާރު ތަމްރީން ކޮށްފައިވާ ކަމަށް ވެސް ވިދާޅުވިއެވެ.

ދުންފަތާ ދުރުވާން ބޭނުންވާ މީހުންނަށް ބޭނުންވާ އެހީތެރިކަން ދިނުމަށް މާލޭގެ ތިން ހޮސްޕިޓަލަކުންނާއި ދަމަނަވެށި އަދި އަތޮޅުތެރޭގެ 48 ތަނަކުން މި ހިދުމަތް ލިބޭގޮތް ވަނީ ހަމަޖައްސާފައެވެ.