އާސަންދަ ކަވަރުކުރާ ބޭހަކަށް ފާމަސީއަކުން އަގު ނަގާނަމަ، އެކަން އެންގުމަށް އާސަންދަ ކުންފުނިން އެދިއްޖެއެވެ.

އެ ކުންފުނިން އާންމުކުރި އިއުލާނެއްގައި ވަނީ އާސަންދައިން ނުލިބޭ ބޭހެއްނަމަ، އެކަން ބޭސް ސިޓީގައި ލިޔެފައި އޮންނާނެ ކަމަށެވެ. އަދި ބަލްކް ޕްރޮކިއުމެންޓު މެދުވެރިކޮށް ރާއްޖެއަށް އެތެރެކުރާ ހުރިހާ ބޭހެއް ވެސް އާސަންދަ ހިދުމަތްދޭ ފާމަސީތަކުން ފޯރުކޮށްދޭނީ ހިލޭ ކަމަށެވެ.

އެހެންކަމުން އާސަންދައި ކަވަރުކުރާ އެއްވެސް ބޭހަކަށް ފާމަސީތަކުން އަގު ނަގާނަމަ، ވައިބަރ ނުވަތަ ވަޓްސްއެޕް މެދުވެރިކޮށް 7951400 ނަންބަރަށް އެންގުމަށް ވަނީ އެދިފައެވެ.

ސަރުކާރުން މިހާރުގެންދަވަނީ ދައުލަތުގެ މާލީ ނިޒާމު އިސްލާހުކުރުމުގެ ގޮތުން އާސަންދައިގެ ނިޒާމަށް ބޮޑެތި ބަދަލުތަކެއް ގެންނަމުންނެވެ. އޭގެތެރޭގައި އާސަންދައިން ދޫކުރާ، އާންމުން އެންމެ ގިނައިން ބޭނުންކުރާ 250 ބޭހުގެ އަގު ކޮންޓްރޯލުކުރުން ހިމެނެއެވެ.