ހިދުމަތް ޖަމިއްޔާ އާއި އުކުޅަސްހޯޕްގެ ފަރާތުން ހދ. ކުރިނބިީގެ ލޯފަން ފަރާތެއް ކަމުގައިވާ ޢަލީ ޝަމީމް އަށް ގެއެއް އަޅައިދީ ހަވާލުކޮށްފިއެވެ.

މިއީ އެ ދެ ފަރާތުން އިސްނަގައިގެން ހެޔޮއެދޭ ފަރާތްތަކުގެ އެހީތެރިކަމާއި އެއްބާރުލުމާއެކު ކުރިއަށް ދިޔަ ބިނާ ޕްރޮޖެކްޓްގެ ދަށުން އަޅައިދިން ގެއެކެވެ.

މި ހިނގާ ޑިސެމްބަރ މަހުގެ 3 ވަނަ ދުވަހު ކުރިނބީގައި އޮތް ކުޑަ ހަފްލާއެއްގައި މި ގެ އަލީ ޝަމީމް އަށް ހަވާލު ކޮށްދެއްވީ ހިދުމަތް ޖަމިއްޔާގެ އެޑްވައިޒަރީ ބޯޑްގެ މެމްބަރު ރާއްޖޭގެ ވޮލީގެ ލެޖެންޑް މުހައްމަދު ސާޖިދު އާއި އުކުޅަސްހޯޕްގެ މެންބަރު، ބިނާ ޕްރޮޖެކްޓްގެ މެނޭޖަރު މުހަންމަދު މުބާރިކް އެވެ.

މިއީ އުކުޅަސްހޯޕް އާއި ހިދުމަތް ޖަމިއްޔާގެ ފަރާތުން އަލީ ޝަމީމުގެ ދިރިއުޅުމުގެ ހާލަތު ބަލައި، އިންޓަވިއުތައް ނަގާ ދިވެހިރައްޔިތުންގެ އެހީތެރިކަމަށް 13 މޭ ގައި ފޭސްބުކް ޕޯސްޓަކުން ހުޅުވާލައިލި ޕްރޮޖެކްޓެކެވެ.

މި ފަންޑަށް ފައިސާ ލިބެން ފެށުމުން ޖުލައި އެއްވަނަ ދުވަހު ޕްރޮޖެކްޓުގެ އެގްރިމެންޓުގައި ކޮންޓްރެކްޓަރާއި އެކު ސޮއެކޮށްފައިވާއިރު، ޢަމަލީ މަސައްކަތް ފެށީ ޖުލައި 6 ވަނަ ދުވަހުއެވެ.

3 ކޮޓަރި އާއި 3 ފާޚާނާ, ސިޓިންރޫމްގައި ބަދިގެ އަދި ސްޓޯރޭޖަކާއި ކުޑަ ލޯންޑްރީ ކޮޓަރިއަކާއެކު މި ޕްރޮޖެކްޓް ނިންމާލީ ޖުމްލަ 7,23,939.86 ރުފިޔާ އަށެވެ.

ހިދުމަތް ޖަމިއްޔާގެ ފަރާތުން ބިނާ ޕްރޮޖެކްޓް ފަރުމާކޮށްފައިވަނީ ރާއްޖޭގައި ސޯޝަލް ހައުސިންގ މިންގަނޑުގެ އެންމެ މެދުމިނަށް ރާއްޖޭގެއި އާއިލާއަކަށް އެންމެ އެފޯޑަބަލްކޮށް އުޅެވޭ ގޮތަށް ތައްޔާރު ކުރާ އެޕާޓްމަންޓްގެ ފެންވަރުގައެވެ.

މިގޭގެ މަސައްކަތް ނިންމާލި އިރު، މިޕްރޮޖެކްޓަށް އެކި ފަރާތްތަކުން ވަނީ ފަރުނީޗަރ ހަދިޔާކޮށްފައެވެ. އެގޮތުން ދަމާސް ކުންފުނީގެ ފަރާތުން ވަނީ 2 ކޮޓަރިއަށް ބެޑްރޫމް ސެޓު ހަދިޔާކޮށްފައެވެ.

މިހަފްލާގައި ބައިވެރިވުމަށް އައްޑޫސިޓީން ކުރިނބީ އަށް އައި ލޯފަން ބައިވެރިއެއް ކަމުގައިވާ ޢަބްދުﷲ ޒިޔާއު ބުނީ ދަމާސް އިން ވެދެއްވި އެހީތެރިކަމަށްޓައި އެކުންފުނީގެ ވެރިންނަށް އިހްލާސްތެރިކަމާއެކު ޝުކުރުދަންނަވާ ކަމަށެވެ. އަދި މި ބޮޑު މަސައްކަތް ނިންމާލުމަށް ދިވެހި ރައްޔިތުން ދެއްވި އެހީތެރިކަމަކީ ޝުކުރާއިއެކު ފާހަގަ ކޮށްލަންޖެހޭ ކަމެއް ކަމުގައި ވެސް ބުންޏެވެ.

"ހަގީގަތުގައި ވެސް މި ސަދަގާތަކީ ވަރަށްބޮޑު ހެޔޮ ޢަމަލެއް، އަލީ ޝަމީމަކީ ލޯފަން ފަރާތެއް އަދި ވަރަށް ކުޑަ ކޮޓަރިއެއްގައި 3 ކުދިން ގޮވައިގެން ވަރަށް ދަތި ހާލުގައި އުޅެމުން ދިޔަ ހިތްވަރުގަދަ ބައްޕައެއް، ލޯފަން ހުރިހާ ކުދިން ގޮވައިގެން ރާއްޖޭގައި އެކުދިންގެ ހައްގުތައް ހޯދައިދިނުމަށް މަސައްކަތްކުރާ ހިތްވަރުގަދަ ލީޑަރެއް، މީ މުޅި ލޯފަން އާއިލާއަށް ލިބުނު އުފަލެއް" އަބްދުﷲ ޒިޔާއު ބުންޏެވެ.

މީގެއިތުރުން ލޯފަން ކުދިންގެ ތެރެއިން މިހަފުލާގައި ބައިވެރިވި ހިނގާ އުޅުމުގައި ނުކުޅެދުންތެރިކަން ވެސް ހުންނަ ފަރާތެއް ކަމުގައިވާ މުހައްމަދު ރަޝީދު ވަނީ މިއީ އޭނާގެ ހަޔާތުގައި އުފާވެރި ދުވަހެއް ކަމުގައި ވަނީ ފާހަގަކޮށްފައެވެ. އަދި އަލީ ޝަމީމަށް ގޭގެ ތަޅުދަނޑި ހަވާލުކުރި ވަގުތު އުފަލުން ރޮވުނު ކަމުގައި ވެސް ބުންޏެވެ.

ބިނާ ޕްރޮޖެކްޓްއަކީ ކޮންމެ އަހަރަކު އެއް ޕްރޮޖެކްޓް ހިންގާގޮތަށް ފެށުނު ޖަމިއްޔާގެ 2 ވަނަ ޕްރޮޖެކްޓެވެ. އަންނަ އަހަރު ވެސް މީގެ ޕްރޮޖެކްޓެއް ކުރިއަށް ދާނެއެވެ.

މި ޕްރޮޖެކްޓް ކާމިޔާބު ކަމާއެކީ ނިންމާ ލެވުނީ ދިވެހި ލޮބުވެތި ރައްޔިތުންގެ އެހީތެރިކަމާއެކުކަން ފާހަގަކޮށް ދިވެހި ލޮބުވެތި ހުރިހާ ރައްޔިތުންނަށް ހިދުމަތް އަދި އުކުޅަސް ހޯޕް ޖަމިއްޔާ އިން ޝުކުރުއަދާކުރެއެވެ. އަދި މި މަސައްކަތުގައި ޢަމަލީގޮތުން ބައިވެރިވެ، އެކި މިންވަރަށް އެހީތެރިކަން ފޯރުކޮށްދެއްވި އެންމެހައި ފަރާތްތަކަށް ވެސް ވަނީ ޝުކުރު އަދާކޮށްފައެވެ.