ރައްޔިތުންނާ ގުޅުން ބަދަހި ކުރުމަށް ދިވެހި ފުލުހުންގެ ހިދުމަތުން ހާއްސަ ހަރަކާތެއް ފަށައިފިއެވެ.

"ފުލުހަކާއެކު ކޮފީއެއް" ގެ ނަމުގައި މި ހަރަކާތް ފަށާފައިވަނީ ޑިސެމްބަރ 5 ވަނަ ދުވަހުއެވެ.

ހުޅުމާލޭ ފޭސް 2 ގެ ބުރުޒު ވީ 8 ކެފޭގައި މި ހަރަކާތް ކުރިއަށް ގެންދިޔައީ ހަވީރު 4 ން އިރުއޮއްސި 6 ޖަހަންދެންނެވެ. މި ހަރަކާތުގައި އެކުވެރި މާހައުލެއްގައި ފުލުހަކާއި ބައްދަލުވެލައި، ވާހަކަ ދައްކާ ރައްޔިތުންގެ ޝުއޫރުތައް ވަނީ އަޑުއަހާފައެވެ.

އެ އިދާރާ އިން ވިދާޅުވީ މިއީ ބަދަހިކުރުމުގެ ކާމިޔާބު ފެށުމެއް ކަމަށެވެ. އަދި މި ބައްދަލުވުމުގައި ގިނަ ބައެއްގެ ބައިވެރިވުން ލިބި، ހުޅުވިގެންވާ މާހައުލެއްގައި ފުލުހުންނާއެކު މުހިންމު މަޝްވަރާތަކެއް ކުރެވުނު ކަމަށެވެ.

މީގެއިތުރުން މިފަދަ ހަރަކާތްތަކަކީ ރައްޔިތުންގެ އިތުބާރު ހޯދައި، ގުޅުން ބަދަހިކުރުމަށް އެޅޭ މުހިންމު ފިޔަވަޅުތަކެއްކަން ފާހަގަކޮށް، މި ހަރަކާތުގައި ބައިވެރިވި ހުރިހައި ފަރާތްތަކަށް ވަނީ ޝުކުރުއަދާކޮށްފައެވެ.

ދިވެހި ފުލުހުންގެ ހިދުމަތުން މި ހަރަކާތް ބާއްވާފައިވާއިރު، "އަވައްޓެރިންގެ ނާސްތާ" ގެ ނަމުގައި ވެސް ދާދި ފަހުން ވަނީ ހަރަކާތެއް ބާއްވާފައެވެ.