ޒުވާނުންނަކީ މި ގައުމުގެ ހަކަތަ ކަމަށާއި ޒުވާނުން ޒުވާނުންގެ ގޮތުގައި މިސަރުކާރުން ބަލައިގަންނާނެކަމަށް ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ އއ. އުކުޅަހުގެ ފުޓުބޯޅަ ދަނޑު ހުޅުއްވައިދެއްވުމަށްފަހު ދެއްކެވި ވާހަކަފުޅުގައެވެ.

ނައިބު ރައީސް ވަނީ އެހަކަތައިގައި ވަރު ނެތްކަމުގައިވާނަމަ، ދިވެހި ގައުމު ނުހިނގާނޭކަން ފާހަގަކުރައްވަމުން، ޒުވާނުންގެ އަޑު އަހައިގެން، ޒުވާނުންނަށް ހުރި ކަންކަން ފުރިހަމަކޮށްދެއްވުމަށް މި ސަރުކާރުން އަހަންމިއްޔަތުކަން ދެއްވާކަމުގައި ވެސް ވަނީ ވިދާޅުވެފައެވެ.

ކޮންމެ ސަރުކާރަކުން ފެއްޓެވި މަޝްރޫއެއް ކަމުގައިވިޔަސް މި ސަރުކާރުން އެ މަޝްރޫއަކަށް އިހްތިރާމުކުރައްވާނޭ ކަމަށާއި، އަދުގެ ސަރުކާރުން އެ މަޝްރޫއުތައް ނިންމަވައިދެއްވާނޭކަމަށް ވެސް އެމަނިކުފާނު ވިދާޅުވިއެވެ.

އުކުޅަހުގައި ހުޅުވި މި ފުޓުބޯޅަ ދަނޑު، މިކަމުގެ ނަމޫނާއަކަށް ފުދޭކަން ފާހަގަކުރައްވަމުން ނައިބު ވިދާޅުވީ މިގޮތަށް ނުނިމި ހުރި ހުރިހާ ދަނޑުތަކެއް ސަރުކާރުން ނިންމަވައިދެއްވާނޭކަމަށް ވިދާޅުވިއެވެ.

ފުޓްބޯޅަ ދަނޑު ހުޅުއްވައިދެއްވުމުގެ ގޮތުން ނައިބު ވަނީ، ދަނޑުގެ ސްޓޭޖު ކުރިމަތީގައި ދަމާފައިވާ ރިބަންފަށް ކަނޑުއްވާލައްވާފައެވެ. އަދި ދަނޑު ހުޅުވުމުގެ މުނާސަބަތުގައި ކުޅުނު މެޗުގައި ބޭނުންކުރި ބޯޅައިގައި ސޮއިކުރައްވާފައިވެއެވެ.

މި މެޗުގައި ވާދަކުރީ ރާއްޖޭގެ ގައުމީ ޓީމުގެ ކުރީގެ ކުޅުންތެރިންގެ މައްޗަށް އެކުލަވާލާފައިވާ ލެޖެންޑުންގެ ޓީމަކާއި، އުކުޅަހު ޒުވާނުންގެ ޓީމެކެވެ.

މި ރަސްމިއްޔާތުގައި ސްޕޯޓްސް މިނިސްޓަރ ޢަބްދުﷲ ރާފިޢު އާއި އުކުޅަހު ކައުންސިލުގެ ރައީސް ޝައުކަތު އިބްރާހިމް ވެސް ބައިވެރިވެވަޑައިގަތެވެ.

ރާއްޖޭގައި ފުޓުބޯޅައިގެ ރޫހު ދިރުވާ އާލާކޮށް، ކުޅިވަރުގެ ދާއިރާއިން ރާއްޖެއަށް ތަރައްގީ ގެނައުމަކީ މި ސަރުކާރުގެ މުހިންމު އަމާޒެކެވެ.