މޯލްޑިވްސް މީޑިއާ ކައުންސިލް (އެމްއެމްސީ) ގެ 8 ވަނަ ދައުރަށް މެމްބަރުން އިންތިހާބުކުރުން ޑިސެމްބަރ 7 ވާ ހޮނިހިރު ދުވަހު (މާދަމާ) އޮންނާނެއެވެ.

މިއީ އެ ކައުންސިލުގައި މިހާރު ހިނގަމުންދާ 7 ވަނަ ދައުރުގައި ހިމެނިވަޑައިގަންނަވާ 10 މެމްބަރެއްގެ ބަދަލުގައި އިންތިހާބު ކުރާ މެމްބަރުންނެވެ. މިދައުރުގެ 10 މެމްބަރުންގެ ދައުރު ހަމަވާނީ ޑިސެމްބަރ 14 ވަނަ ދުވަހަށެވެ.

މި އިންތިހާބު ކުރިއަށްދާނީ މާދަމާ ހެނދުނު 10 ން 11 ޖަހަންދެން ސޯޝަލް ސެންޓަރުގައެވެ.

އެމްއެމްސީގެ ކައުންސިލު އެކުލެވިގެންވަނީ މީޑިއާގެ އިދާރާތައް ތަމްސީލުކުރާ 8 މެންބަރުންނާއި އާންމުންގެ ތެރެއިން އިންތިހާބު ކުރެވޭ 7 މެންބަރުންނާއެކު ޖުމްލަ 15 މެންބަރުންގެ މައްޗަށެވެ. މިއީ ދެ އަހަރުގެ ދައުރަކަށްވާއިރު، އެއްވެސް މެމްބަރަކަށް ޖެހިޖެހިގެން ދެ ދައުރުގައި ނުހުރެވޭނެއެވެ.

ދައުރުގެ މެދުތެރެއިން މެމްބަރަކު ވަކިކޮށް ނުވަތަ އިސްތިއުފާދީފިނަމަ، އަލަށް އިންތިހާބުވާ މެމްބަރުންގެ ދެ އަހަރު ގުނާނީ އިންތިހާބުކުރާ ދުވަހުން ފެށިގެންނެވެ.