ކޮންސްޓަރަކްޝަން މިނިސްޓްރީން ފުވައްމުލައް ސިޓީ ކައުންސިލާ ބައްދަލުކޮށް މަޝްވަރާ ކޮށްފިއެވެ.

މި މަޝްވަރާކުރައްވާފައިވަނީ އެ މިނިސްޓްރީގެ އިސްވެރިން ފުވައްމުލަކު ސިޓީއަށް ކުރެއްވި ދަތުރުފުޅެއްގައެވެ. ފުވައްމުލަކު ސިޓީ ކައުންސިލާއި ބައްދަލުކުރައްވައި، ވަނީ ތަރައްގީގެ މަޝްރޫއުތަކާއި ބެހޭގޮތުން މަޝްވަރާތައް ކުރިއަށް ބާއްވާފައެވެ.

މި ދަތުރުފުޅުގައި ބައިވެރިވެވަޑައިގެންނެވީ ސްޓޭޓް މިނިސްޓަރ އިބްރާހީމް ނަޡީމް، ޑެޕިއުޓީ މިނިސްޓަރ މުޙައްމަދު ޢިމްރާން ޙަސަން، ޑެޕިއުޓީ މިނިސްޓަރ ޙަސަން ވިސާލް އަދި މިނިސްޓްރީގެ ސީނިއަރ އޮފިޝަލުންނެވެ.

ފުވައްމުލަކު ސިޓީ ކައުންސިލާއެކު ބޭއްވި ބައްދަލުވުމުގައި އެ ސިޓީގައި ކުރިއަށްދާ އެކިއެކި ތަރައްގީގެ މަޝްރޫއުތަކާ ބެހޭގޮތުން ފުޅާ ދާއިރާއެއްގައި މަޝްވަރާކުރެވުނެވެ. އަދި އެ ސިޓީގައި ހިންގަމުންދާ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއުތައް ކުރިއަށްދާ ސަރަހައްދުތަކަށް ޒިޔާރަތްކުރައްވައި، މަސައްކަތްތައް ކުރިއަށްދާގޮތް ބައްލަވާލެއްވިއެވެ.

މި ދަތުރުފުޅުގައި އެ ސިޓީގެ މަގުހެދުމުގެ މަޝްރޫއު ކުރިއަށްގެންދިއުމަށް ހަވާލުކޮށްފައިވާ ކޮންޓްރެކްޓަރ ކަމުގައިވާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ) ގެ ޓީމާވެސް ބައްދަލުކުރެއްވިއެވެ.

މި ބައްދަލުވުމުގައި މަގުހެދުމުގެ މަޝްރޫއުގެ މަސައްކަތް ކުރިއަށްދާގޮތާއި ދިމާވެފައިވާ ގޮންޖެހުންތަކާ ބެހޭގޮތުން މަޝްވަރާކުރެވުނެވެ. މި ދަތުރުފުޅަކީ ފުވައްމުލަކު ސިޓީގެ ތަރައްގީގެ މަޝްރޫއުތައް އަވަސްކުރުމަށާއި، ކުރިމަތިވެފައިވާ ދަތިތައް ހައްލުކުރުމަށް އެޅޭނެ ފިޔަވަޅުތައް ދެނެގަތުމަށް މުހިންމު ދަތުރުފުޅެއް ކަމުގައި ފާހަގަކުރެވެއެވެ.