ފަރުޟު ފަސްނަމާދު އޭގެ ވަގުތުގައި އަދާކުރުމަކީ ތިމާގެ ޢަމަލުތައް ސީދާވެ، ކުރާ މަސައްކަތުގައި ބަރަކާތް ލައްވާ ކަމެއް ކަމުގައި ހުކުރު ހުތުބާގައި ހަނދާންކޮށްދީފިއެވެ.

ހުތުބާގައި ވަނީ ދީނުގައި އަންގަވައިފައިވާ ގޮތުގެ މަތީން، ނަމާދުތައް އޭގެ ޝަރުތުތަކާއި ރުކުންތަކާއި ވާޖިބުތަކާއި މުސްތަހައްބު ކަންތައް ފުރިހަމަކޮށްފި މީހާއަށް ލިބޭ ފައިދާތަކުގެ ތެރޭގައި ފާހިޝްކަންތައްތަކާއި މުންކަރާތްތަކުން ދުރުހެލިކޮށްދިނުން ހިމެނޭކަން ހަނދާންކޮށްދީފައެވެ. އަދި ވަގުތަށް ކަމޭހިތުމާއި، އަމުރަށް ކިޔަމަންވުމާއި، ﷲ އަށް ބިރުވެތިވެ ހުޝޫއަތްތެރިވުން ފަދަ ކަންކަން ހިމެނޭކަން ވެސް ހަނދުމަކޮށްދީފައި ވެއެވެ.

މީގެއިތުރުން ނަމާދަކީ އެންމެންގެ މައްޗަށް ފަރުޟު ކުރައްވައިފައިވާ އަޅުކަމަކަށް ވީ ހިނދު، ހުކުރުގެ ޖަމާއަތަށް ސަމާލުކަން ދޭ ފަދައިން ފަރުޟު ފަސް ނަމާދަށް ވެސް ސަމާލުކަން ދިނުމަށް ވަނީ ގޮވާލާފައެވެ.

ހުތުބާގައި ވަނީ ޒުވާނުންނާއި ފުރާވަރުގެ ކުދީން މިސްކިތްތަކުން ފެންނަ އަދަދު މަދުވުމަކީ ހިތާމަ ކުރާކަމެއްކަން ފާހަގަކޮށްފައެވެ. އަދި ރީތި މިސްކިތްތަކެއް ކިތަންމެ ބައިވަރު އަދި ކައިރިކައިރީގައި ބިނާކުރެވުނަސް އެ މިސްކިތްތަކުގެ ފަޅުފިލުވާން އަރާނެ ބަޔަކު ނުވާ ނަމަ އެއީ އަހަރެމެން އެކަމާ ބިރުގަންނާން ޖެހޭނެ ކަމެއް ކަމުގައި ބުނެފައި ވެއެވެ.