ޗައިނާގެ އެހީގެ ދަށުން ގާއިމުކުރެވުނު ލޮނުފެން މީރުކުރާ ނިޒާމު އިވެލުއޭޓްކުރުމަށް ވަޑައިގަތް ޗައިނާގެ މާހިރުންގެ ކޮންސްޓްރަކްޝަން މިނިސްޓްރީގެ ޓީމާ ބައްދަލުކޮށްފިއެވެ.

މިނިސްޓްރީއިން މިއަދު ހާމަކުރި ގޮތުގައި، ޗައިނާގެ އެހީގައި ޤާއިމުކުރެވުނު މައިކްރޯ-ގްރިޑް ލޮނުފެން މީރުކުރާ ނިޒާމުގެ އިވެލުއޭޝަން މަސައްކަތްވަނީ އެއްކޮށް ނިމުމަކަށް އައިސްފައެވެ.

މި މަޝްރޫއުގެ އިވެލުއޭޝަން މަސައްކަތް ކުރިއަށް ގެންދިޔައީ ޑިސެމްބަރު މަހުގެ 2 އިން 5 އަށެވެ.

މި މުއްދަތުގެ ތެރޭގައި ޗައިނާގެ މާހިރުންގެ ވަފުދެއް ކ. ކާށިދޫ އަދި ހއ. ކެލާގައި ގާއިމުކުރެވިފައިވާ ލޮނުފެން މީރުކުރާ ޕްލާންޓްތަކަށް ޒިޔާރަތްކޮށް، އެ ޕްލާންޓްތަކުގެ ހާލަތާއި މަސައްކަތްކުރާ ގޮތް ވަނީ ބައްލަވާލައްވާފައެވެ.

މިބައްދަލުވުމުގައި މިނިސްޓްރީގެ ފަރާތުން ބައިވެރިވެ ވަޑައިގަތީ ސްޓޭޓް މިނިސްޓަރ އިބްރާހީމް ތާއާމް މުޙައްމަދާއި މިނިސްޓްރީގެ ޓެކްނިކަލް ޓީމެވެ. ޗައިނާގެ ފަރާތުން ބައިވެރިވެ ވަޑައިގަތީ އެ ޤައުމުގެ މާހިރުންގެ ވަފުދެވެ.

މި މަޝްރޫއުގެ ސަބަބުން ރާއްޖޭގެ ރަށްތަކުގައި ސާފު ބޯފެން ލިބުމުގެ ދަތިކަން ޙައްލުކުރުމަށް އެހީތެރިވެދޭނެ ކަމަށްވެސް މިނިސްޓްރީއިން އުއްމީދު ކުރައްވައެވެ.